Partııanyń Atqarýshy hatshysy Ashat Oralov bir rettik prezıdenttik merzim týraly bastama sýperprezıdenttik modelden túpkilikti ketý boıynsha buǵan deıingi qadamdardyń qısyndy jalǵasy ekenin atap ótti. Onyń aıtýynsha, prezıdenttik ókilettiktiń merzimin 7 jylda bir kadensııaǵa deıin qysqartý Ádiletti Qazaqstannyń saıası kepili. «Osynaý batyl da biregeı qadam elimizdiń aldaǵy ýaqyttaǵy saıası baǵytyna qatysty suraqtardyń jaýabyn tabýǵa múmkindik beredi. Konstıtýsııaǵa tıisti ózgeristerdi keıinge qaldyrmaı, osy jyldyń ózinde-aq engizý qajet dep sanaımyn», dedi Ashat Oralov.
Májilistegi Amanat partııasynyń depýtaty Erlan Saırov qoǵamnyń Joldaýdy belsendi talqylaýy ulttyq tutastyqtyń nyǵaıýyna yqpal etedi dep sanaıdy. «Burynǵy júıeni joıý úshin prezıdenttikti bir merzimge shekteý qajet. Búgingi saıası reformalardyń negizgi máni – osy. Jeti jyldyq merzimge keletin bolsaq, bul oıǵa alǵan mindetterdi iske asyrý úshin jetkilikti kezeń. Sonymen qatar bıliktiń monopolııalanýyna jol bermeıdi. Barlyq salanyń damýynda turaqtylyq paıda bolady», dep atap ótti E.Saırov.
О́z kezeginde qoǵam qaıratkeri Ǵalym Baıtoq Prezıdent kezekten tys saılaý jarııalaý arqyly batyl qadam jasap otyrǵanyn atap ótti. Ol jeti jyldyń qalypty jumys merzimi ekenin aıtady. «Eger qazirgi Prezıdent osy jyly birden jeti jyldyq merzimge bet alatyn bolsa, onda onyń ókilettigi qaıtken kúnniń ózinde 2029 jyly aıaqtalady. Iаǵnı qazirgi normaǵa sáıkes 2024 jyly saılaýǵa tússe de solaı bolar edi. Iаǵnı onyń ókilettik merzimi is júzinde bir jylǵa da uzarmaıdy. Sonymen qatar prezıdentterdiń ókilettik merzimi 10 jyldan 7 jylǵa deıin qysqarady», dedi sarapshy.
«Prezıdenttiń ornyqty ádil memleket qurý jónindegi naqty saıası maqsaty bar. Bul maqsat reformalardy, sonyń ishinde tanymaldylyǵy joq reformalardy qajet etedi. Ony iske asyrý úshin mandat pen ýaqyt qajet. Jeti jyl – belgilengen reformalardy júzege asyrý úshin jetkilikti merzim dep esepteımin», dep atap ótti saıasattanýshy ári qoǵam qaıratkeri Danat Jumın.
Talqylau otyrysynda Májilistegi Amanat fraksııasynyń múshesi Ekaterına Smyshlıaeva Joldaýdaǵy eldiń ekonomıkalyq damýyna qatysty aspektilerge nazar aýdardy. Kez kelgen ózgeristiń negizi – myqty ekonomıka ekenin alǵa tartqan depýtat: «Joldaýda aýqymdy áleýmettik-ekonomıkalyq blok usynyldy. Bul – reformalardyń jańa tolqyny emes, buǵan deıin belgilengen baǵyttyń qısyndy jalǵasy. Memlekettiń ekonomıkadaǵy rólin azaıtý, ony monopolııasyzdandyrý, resýrstardy ádil bólý qadamdary aldaǵy ýaqytta eleýli ekonomıkalyq ilgerileýler týraly aıtýǵa múmkindik beredi. Ádil qoǵamnyń irgesi qalanady», dedi.
Jıynda Eýropalyq quqyq jáne adam quqyqtary ınstıtýtynyń dırektory, professor Marat Báshimov sot-quqyq salasyn reformalaýǵa qatysty oıyn ortaǵa saldy. «Sýdıa tek sot tóreligimen aınalysýy kerek. Ol kadr máselesine aralaspaýǵa tıis. Aralasatyn bolsa, sybaılas jemqorlyq táýekelderi paıda bolady. Prezıdent revolıýsııalyq sheshim usyndy. Endi Joǵary Sot Keńesi irikteýmen, oqytýmen, attestattaýmen jáne taǵy basqamen aınalysady. Al sýdıalar óz jumysyn isteıdi. Tıisinshe olar atqaratyn jumystyń tıimdiligi artady», dedi ol.
Al «Qazaqstannyń Azamattyq Alıansynyń» prezıdenti Baný Nurǵazıevanyń pikirinshe, osy kúngi ózekti máseleniń biri – memlekettik basqarý júıesin qaıta júkteý. «Biz tek túsindirip qana qoımaı, bastamalardy júzege asyrýǵa jáne qoǵamdyq monıtorıng úderisterine ózimiz de aralasyp, qoǵamdy da jumyldyrýymyz kerek. Jaqsy reformany qolǵa alýǵa bolady. Biraq ony júzege asyrý barysy erekshe nazar aýdarýdy qajet etedi», dedi sarapshy.
Talqylau alańynyń moderatory partııa Saıası keńesiniń múshesi, tanymal telejúrgizýshi Maqsat Tolyqbaı boldy.
