Otyrysty ashqan Erlan Qoshanov Memleket basshysy Konstıtýsııalyq Keńestiń qaraýyna usynǵan 7 jyldyq merzimdi engizý jáne elordanyń atyn ózgertý jónindegi máseleler Májilistegi barlyq fraksııa depýtatynyń usynysy ekenine nazar aýdardy.
«Prezıdent mandatyn 7 jyldyq bir merzimmen shekteý – progressıvti ári qajetti norma. Bul bıliktiń bir qolǵa shoǵyrlanýyna tosqaýyl bolyp, sýperprezıdenttik basqarý júıesinen túbegeıli arylýǵa jol ashady. Atalǵan másele el arasynda jan-jaqty talqylanýda. Biz osy saılaý júıesin bıyldan bastap engizýdi qoldaımyz», dedi fraksııa jetekshisi.
Sondaı-aq Erlan Qoshanov elordanyń ataýyn ózgertý týraly usynys Tuńǵysh Prezıdenttiń qazirgi Qazaqstannyń qurylýy jolyndaǵy eńbegin joqqa shyǵarmaıtynyn aıtyp, qoǵamnyń da pikiri eskerilgenine mán berdi.
Odan ári depýtattar usynylǵan reformalardy qoldap sóz sóıledi.
Májilistegi Qazaqstan halqy Assambleıasy depýtattyq tobynyń jetekshisi Saýytbek Abdrahmanov jańa normalardyń ýaqtyly engizilip jatqanyna nazar aýdaryp, Májilis bul máselede óziniń tarıhı jaýapkershiligin sezinip otyrǵanyn atap ótti.
«Qazaqstanda Prezıdenttiń keń ókilettikteri bar. Sondyqtan saılaý prosesinde joǵary laýazymdy tulǵanyń turaqty túrde aýysyp otyrýy Memleket basshysynyń qolynda bıliktiń shamadan tys shoǵyrlanýy men monopolııalanýynyń aldyn alýǵa múmkindik beredi», dedi S.Abdrahmanov.
Al depýtat Elnur Beısenbaev Prezıdenttiń mandatyn qaıta saılaný quqyǵynsyz 7 jyldyq bir merzimmen shekteý engizýdiń mańyzdylyǵyn aıtty.
«Qaıta saılaný quqyǵynsyz bir rettik prezıdenttik merzimdi engizý saıası jańarý deýge bolady. Ol saılanǵan kandıdatqa halyq aldyndaǵy bergen ýádelerin tıimdi ári ýaqtyly oryndaýǵa septigin tıgizedi. О́ıtkeni saılanǵan prezıdenttiń ekinshi múmkindigi bolmaıdy. Aldaǵy 20 jyldyqta biz jańadan saılanǵan úsh prezıdentti kóremiz», dedi E.Beısenbaev
Sonymen qatar depýtat Konstıtýsııaǵa bul túzetýler aldaǵy saılaýǵa deıin engizilse, osy joly Prezıdent atanatyn azamat jáne odan keıingi barlyq Memleket basshylary úshin prezıdent saılaýyna qaıta qatysý múmkindigi zańmen shekteletinin atap ótti.
Depýtat Iýrıı Jýlın prezıdenttiktiń bir merzimi týraly norma Qazaqstanda saıasatkerlerdiń jańa býyny paıda bolýyna yqpal etetinin jáne turǵyndardyń elordanyń atyn ózgertýden úlken úmit kútetinin aıtty.
«Depýtattardyń elordaǵa burynǵy ataýyn qaıtarý týraly bastamasy eń áýeli kóptegen azamattyń ótinishine negizdelip otyr. Biz búgin halyqtyń únine qulaq asyp, Prezıdentti qoldap, qoǵamnyń kúsh-jigerin ilgeri basý úshin jumyldyrýymyz kerek», dedi Iýrıı Jýlın.
О́z kezeginde, depýtat Vera Kım Qazaqstan 7 jyldyq prezıdenttik merzimdi engizetin álemdegi jalǵyz el emes ekenine nazar aýdardy.
«Álemde Prezıdentti bir ret saılaý tájirıbesi júz jyldan asa ýaqyt boıy jalǵasyp kele jatqan elder bar. Mysaly, Izraıl (7 jyl), Armenııa (7 jyl), Meksıka (6 jyl), Ońtústik Koreıa (5 jyl) elderinde osyndaı tájirıbeni kezdestirýge bolady. Fransııada da bir rettik 7 jyldyq prezıdenttik merzimdi engizý múmkindigi talqylanyp jatyr. Bul tendensııa álemde keń taralyp qana qoımaı, qanat jaıyp keledi degen sóz», dedi depýtat.
Fraksııa otyrysyn qorytyndylaǵan E.Qoshanov depýtattarǵa aqparattyq-túsindirý jumystaryn kúsheıtý jóninde birqatar tapsyrma berdi. Reformalardyń máni men mańyzyn barlyq qazaqstandyqqa jetkizý qajet ekenin atap ótti. Ol úshin áleýmettik jelilerdiń, BAQ-tyń múmkindikterin barynsha paıdalaný jáne halyqpen belsene kezdesý kerektigine nazar aýdardy.
