Kollajdy jasaǵan Qonysbaı ShEJIMBAI, «EQ»
«Salamatty Qazaqstan» poıyzy birinshi Qostanaı oblysy aýmaǵyndaǵy Sarykól stansasyna toqtady. Dárigerler munda pasıentterdi 11-12 qyrkúıek kúnderi qabyldady. Medısına qyzmetkerleri 13-14 qyrkúıekte – Jarkólde bolsa, 15-17 qyrkúıekte – Toǵyzaqta, 18-19 qyrkúıekte – Zaaıatta, 20-21 qyrkúıekte – Qazanbasyda, 22-23 qyrkúıekte – Qoıbaǵarda, 24-25 qyrkúıekte – Kovylnaıada, 26-27 qyrkúıekte Tasty-Taldyda jáne 24-25 qyrkúıekte Fýrmanovskııda bolyp, jergilikti turǵyndardy qabyldaıdy.
Medısınalyq poıyzdyń dárigerleri Soltústik Qazaqstan oblysyndaǵy jumysyn qorytyndylady. Munda alǵashqy medısınalyq jáne konsýltasııalyq kómekti 3 108 adam aldy, olardyń ishinde 402-si – bala.
Dárigerlerdiń aıtýynsha, soltústikqazaqstandyq turǵyndarda kóbine uıqy beziniń kıstasy, pýlpa jáne perıapıkaldi tinderdiń aýrýlary, búırek jáne nesepaǵar tastary, sozylmaly obstrýktıvti pıelonefrıt, tuzdy dıatez aýrýlary anyqtaldy. Statıstıkaǵa sáıkes «Salamatty Qazaqstan» poıyzynyń eń suranysqa ıe mamandary – hırýrg, qulaq, muryn, kóz jáne tis dárigeri.
Akýsher-gınekolog Gúlmıra Berdalı 2 aıdan astam ýaqyt boıy medısınalyq poıyzda qabyldaý júrgizip keledi. Osy ýaqyt ishinde ol úsh oblystyń shalǵaı aýyldarynyń turǵyndaryna kómek kórsetti.
«О́kinishke qaraı, aýyldarda turatyn áıelder kúndelikti tirlikten qol úze almaǵandyqtan gınekologke sırek barady. Maǵan 15-20 jyl boıy mamannyń qabyldaýynda bolmaǵan pasıentter keldi. Al gınekologııalyq tekserýden jylyna keminde bir ret ótý kerek. Biz olardy tekseremiz, aýrýlaryn anyqtaımyz. Keıde emdeý tásilderin ózimiz taǵaıyndaımyz, al qandaı da bir jaǵdaılarda oblystyq aýrýhanalarǵa qosymsha keńes alýǵa jiberemiz», dedi dáriger.
Osy múmkindikti paıdalana otyryp, Gúlmıra Berdalı qazaqstandyqtarǵa densaýlyqty saqtaý úshin medısınalyq tekserýden jyl saıyn ótý keregin eske salady.
Akýsher-gınekologten basqa medısınalyq poıyzda terapevt, pedıatr, kardıolog, nevropatolog, okýlıst, qulaq, muryn jáne tis dárigeri, hırýrg, ýrolog, mammolog sııaqty mamandar jumys isteıdi.
«Biz barlyq pasıentti qabyldaımyz – balalardan eresekterge deıin. Bizdiń mamandar birlese, jedel jumys isteıdi. Eger azamattar densaýlyǵyna baılanysty bizdiń arnaıy jabdyqtalǵan kabınetterge kóterile almasa, onda poıyzdyń dárigerleri olarǵa ózderi túsip, sol jerde suraqtaryn qoıady», deıdi «Salamatty Qazaqstan» medısınalyq poıyzynyń jetekshisi Aman Qasenov.
Poıyz barlyǵy 67 stansany júrip ótedi. Qazirgi tańda dárigerler 40-tan astam aýyldyń turǵyndaryn tekserdi.
Poıyzdyń quramynda jeti mamandandyrylǵan vagon bar, olardyń tórteýi – jabdyqtalǵan medısınalyq kabınet. Ol ýltradybystyq kabınet, zerthana, stomatologııalyq jabdyqtar jáne taǵy basqalarymen qamtylǵan. Eki uıyqtaıtyn vagon, bir meıramhana jáne taǵy biri – poıyzdy úzdiksiz energııamen qamtamasyz etetin tehnıkalyq vagon bar.
Medısınalyq poıyzdyń mamandaryna tekserilýge keıbir turǵyndar otbasy bolyp keledi. Mahasovtar otbasy dárigerlerden keńes alý úshin eki kishkentaı balasymen keldi.
«Biz búgin hırýrg, ÝDZ mamany, kardıolog jáne tis dárigerine bardyq. Dárigerler óte muqııat qarady. Biz turǵyndarǵa aýyldan shyqpaı-aq, sharýashylyǵyn tastamaı-aq tekserýge múmkindik berilgenine qýanyshtymyz», dep bólisti jas ana Jaısan.
«Salamatty Qazaqstan» poıyzy osyǵan deıin Soltústik Qazaqstan oblysynan bólek, Aqmola oblysynyń stansalaryna da qyzmet kórsetti. Alaıda bul aımaqta jumys áli aıaqtalǵan joq, dárigerler bul óńirge 4-9 qazan aralyǵynda oralyp, taǵy 3 stansanyń turǵyndaryn tekseredi.
Eske sala keteıik, «Salamatty Qazaqstan» «Járdem» poıyzymen birge medısınalyq qyzmetke muqtaj shalǵaı stansalardyń turǵyndaryna alǵashqy medısınalyq-sanıtarlyq jáne konsýltatıvti-dıagnostıkalyq kómek kórsetedi. Qazirgi ýaqytta «Járdem» medısınalyq poıyzy Túrkistan oblysynyń turǵyndaryn qabyldap jatyr.
Jalpy, «Medısınalyq poıyzdar» jobasy alǵash ret 2010 jyly iske qosyldy jáne 2019 jylǵa deıin jyl saıyn júzege asyryp kelip, pandemııa kezinde úzilis aldy. Osy kezeń aralyǵynda «Densaýlyq», «Járdem» jáne «Salamatty Qazaqstan» konsýltatıvti-dıagnostıkalyq úsh poıyz Qazaqstannyń 1 700-den astam shalǵaı óńirine baryp, 488 880 turǵyndy qarady.
Medısınalyq poıyzdardyń qozǵalys kestesi týraly naqty aqparatty jobanyń www.medpoezd.kz resmı saıtynan nemese 8 7172 60 45 94, 8 701 206 15 40 nómirleri arqyly, sondaı-aq @medpoezd.kz
Instagram paraqshasynan bilýge bolady.
Joba Samruk-Kazyna Trust áleýmettik jobalardy damytý qorynyń qarjylyq qoldaýymen jáne Densaýlyq saqtaý mınıstrliginiń qatysýymen, «Qazaqstan temir joly» UK AQ janyndaǵy «Áleýmettik jobalar qory» korporatıvtik qorymen birlesip júzege asqanyn aıta ketkimiz keledi.
