Ulttyq ulan baspasóz qyzmetiniń málimetinshe, elordanyń qoǵamdyq tártibin tıisti deńgeıde qamtamasyz etý, sondaı-aq mańyzdy is-sharada quqyq buzýshylyqtyń aldyn alý jáne jolyn kesý maqsatynda 5573 áskerı bóliminiń jeke quramy 13 qyrkúıekten bastap kúsheıtilgen qyzmet rejimine aýystyrylǵan. Elordalyq jedel quramadan 1 200-ge jýyq áskerı qyzmetshi delegasııa múshelerin qarsy alý, olardyń qala ishinde qozǵalýy kezindegi qaýipsizdikti qamtamasyz etý qyzmetin atqaryp jatyr.
Sondaı-aq jedel kúshterdi kúsheıtý úshin Qaraǵandy jáne Kókshetaý qalalarynan Ulttyq ulannyń 600-den astam áskerı qyzmetshisi kelgen.
– Elordaǵa álemniń túkpir-túkpirinen qonaqtardyń kelýine baılanysty qoǵamdyq oryndarda, kóshelerde, sondaı-aq mádenı-buqaralyq is-sharalar ótkiziletin jerlerdegi qaýipsizdik sharalary kúsheıtildi. Máselen, buqaralyq aqparat quraldary Rım Papasy Fransısktiń qatysýymen ótetin is-sharaǵa 7 myńnan astam adam qatysqanyn habarlady. Qoǵamdyq tártipti qamtamasyz etý úshin Ulttyq ulannyń 5510, 5451 áskerı bólimderiniń jeke quramy keldi. Olardyń halyqaralyq kórmelerdi, sondaı-aq basqa da iri mádenı jáne sporttyq is-sharalardy ótkizý kezinde elordada quqyqtyq tártipti qadaǵalaýda tájirıbeleri bar. Sebebi buǵan deıin EKSPO-2017 halyqaralyq kórmesi jáne elordanyń 20 jyldyq mereıtoıy kezinde de arnaıy kelgen bolatyn, – deıdi «Ortalyq» óńirlik qolbasshylyǵy qolbasshysynyń birinshi orynbasary – shtab basshysy, polkovnık Nurbol Mirtaev.
«Osyndaı tarıhı oqıǵa kezinde elordada qyzmet atqaryp jatqanyma qýanyshtymyn. Ulttyq ulanǵa kelgenime 9 aı boldy, osy ýaqyt ishinde Jezqazǵan qalasyna, jańadan qurylǵan Ulytaý oblysyna el Prezıdenti barǵan kezde qaýipsizdikti kúsheıtýge jumyldyrylǵan bólimshe quramynda boldym. Ulttyq ulandaǵy qyzmet óte qyzyqty, kúndelikti qyzmetten basqa, memlekettik jáne halyqaralyq is-sharalar barysynda qoǵamdyq tártipti saqtaýǵa úles qosatynymdy maqtan tutamyn», deıdi 5451 áskerı bóliminiń qatardaǵy sarbazy Dıas Qaıyrbaev.
Rım Papasy Fransısktiń, sondaı-aq alys jáne jaqyn shetel delegasııasynyń qatysýymen ótken Álemdik jáne dástúrli dinder kóshbasshylarynyń VII sezi kezinde quqyqtyq tártip áskerine mańyzdy mindetter júkteldi. Sondaı-aq ulandyqtarǵa Qazaqstandaǵy Vatıkan Qasıetti Taǵynyń elshiligin qorǵaý mindeti júktelgen.
