Baıyrqap qarasaq, qazaqtyń kórpesi ári qalyń, ári jyly. Bizdiń kórpemizdi jamylmaǵan halyq joq shyǵar, qıyn kúnderdiń bárinde kórpemiz basqalarǵa pana boldy. Kórpemizdi qosyla jamylǵandardyń bári aıtýly kúni qandaı jaqsy sóz, jaǵymdy jańalyq estir ekenbiz dep kórpe astynan moıyndaryn qyltıtyp, qulaqtaryn túrip júrdi.
Joldaýda jaqsy sóz kóp, munyń bári – bolashaqtyń bastaýy. Ulttyq qordy halyq nesibesi dep qarap, el ıgiligine jaratý degen qulaqqa jaǵymdy ári júrekti dúrsildetetin-aq sóz. Tek aqyry qaıyrly bolsyn. Jolaı Batyrash-Qotyrashtardyń kes-kesteýinen saqtasyn. Qańtar qyrǵynyna qatysqandarǵa jeńildik jasaý da el muńy men armany edi. Ol da oryndalatyn boldy. Joldaýdy kógildir ekrannan kórip, tyńdap, jaqyn mańdaǵy saıabaqqa júrek dúrsilimizdi basaıyn dep shyǵa berip edim, kúnde kórip júrgen kók kóz, sary shashty jolaı dos tarpa bas saldy. «Áne, Prezıdenttiń ózi aıtty, qazaq jáne orys tilderin qatar meńgerý kerek dep. Sender memlekettik til dep sózdi shyǵyndaı beresińder» dep alqymnan aldy. Tilimdi tistep qaldym. Sol jerge «Qazaqstandy mekendeýshi árbir ulttyń ókili memlekettik tildi bilýge tıis» degen bir sóılem kerek-aq edi. Úıden shyqqan bette kórpemizdi bólip jamylǵandardyń kózimizdi shuqyp turǵanyn qarashy.
Qazaq – keń pishilip, Qudaıyna qaraǵan halyq. Tilimizdi de, jerimizdi de bireýge berip qoıyp, endi qańbaq sózdi qýalap júrmiz. Ábish Kekilbaıdyń «Tasbaqanyń shóbi» degen áńgimesi «Sáti túseıin dese, bári ońynan orala ketedi eken» dep bastalady. Sáti túsip-aq tur, biraq tasbaqa aıańmen aýzymyzdaǵy shóbimizdi áli alyp kele jatyrmyz. Tasbaqa kórgen jolaýshynyń joly bolady deýshi edi, qaıran Ábekeń ony áldeqashan kórip, ómirden ótip ketken joq pa? Bizge tasbaqa aıań emes, qasqyrdyń júıtkýi kerek. Áıtpese qanaǵatshyl tasbaqanyń shóbin jolda áldekimder qaqshyp ketýi kádik. Keń kórpemizdi bir jelpip tastaıtyn kez keldi. Sonda ıis-qońystan arylar edik. Yq jaqtan da yzǵar soǵyp tur. Saıabaqta da jóndep serýendeı almaısyń. Áldekimnen sóz estip qalam ba dep óz jerińde óziń qýystanyp júresiń...
Joldaý – jańa ómirdiń jarshysy. Jańǵyrǵan Qazaqstanda jaqsy isterimiz mol bolǵaı!
Qýandyq TÚMENBAI,
jazýshy
