Prezıdent Joldaýynda Otanyn súıetin erlerdi tárbıelegen qyrǵyz analaryna alǵysyn bildirdi.
«Otan úshin jan berip, qaza tapqan jaýyngerlerdiń analaryna aıtarym naǵyz batyrlardy tárbıeledińizder, men sizderge bas ıemin. Árbir batyrdyń erligi qyrǵyz halqynyń jadynda máńgi saqtalady. Otan qorǵaý jolynda qaza tapqan árbir jaýyngerdiń týǵan-týystary men jaqyndaryna qaıǵylaryna ortaqtasyp kóńil aıtamyn», dedi Japarov.
Onyń aıtýynsha, qaqtyǵys kezinde qıraǵan úılerdi qalpyna keltirýge memlekettiń múmkindigi bar.
«Qaqtyǵys kezinde qırap, órtengen úılerdi tez arada qalpyna keltiremiz. Az ýaqyt ishinde biz aıtarlyqtaı nyǵaıdyq. Bul ishki jáne syrtqy jaýlardy da qatty alańdatady», dedi Qyrǵyz Respýblıkasynyń Prezıdenti.
Sondaı-aq ol qaıǵyly oqıǵa bolǵan Batkenge halyqtyń barmaýyn ótindi. Onyń sózinshe, shekaradaǵy máseleni retteýge memlekettiń áskerı áleýeti jetkilikti.
«Taǵy bir aıta ketetin jaıt: men Batkenge barǵysy keletin jigitterdi sabyrǵa shaqyramyn. Memlekettiń áskerı áleýeti bir deńgeıde dep oılamańyz. Qudaıǵa shúkir, búginde áskerdiń jaǵdaıy basqasha. Shekara buzýshylarǵa toıtarys berýge bizde batyl jaýyngerler men kúsh jetkilikti. Oǵan dálel jerimizge basyp kirgenderdiń jazalanýy. Biz halyqtan sabyr saqtap, bılik pen qarýly kúshterdiń áreketin birlikpen qoldaýdy suraımyz», dedi Sadyr Japarov.
Eske salaıyq, 16 qyrkúıek kúni tańerteń Qyrǵyzstan men Tájikstan shekarasyndaǵy birneshe ýchaskede atys bastaldy. Qyrǵyz Respýblıkassynyń UQK shekara qyzmetiniń málimetinshe, shamamen saǵat 6:00-de tájik tarapy shekara otrıadtary men qyrǵyz tarapynyń pozısııalaryn atqylaı bastaǵan.
