Keden odaǵy elderinde keıbir baǵyttarda ushaq bıletteri poıyz jol kiresinen arzan

ASTANA. 16 mamyr. Básekelestik jáne monopolııaǵa qarsy retteý jónindegi Eýrazııalyq ekonomıkalyq komıssııanyń mınıstri Nurlan Aldabergenov transshekaralyq naryqtaǵy áýe jáne temirjol tasymaldaryndaǵy bılet baǵalary turǵysyndaǵy jaǵdaıdy ekonomıkalyq qısynsyzdyq ekenin málimdedi. Bul týraly gazeta.kz habarlady. Tarazda ótken Eýrazııalyq ekonomıkalyq komıssııa otyrysynda temirjol jáne áýe tasymaldaryndaǵy naryqtardyń teń básekelestik jaǵdaılary sóz boldy. Basqosýǵa Keden odaǵy men Biryńǵaı ekonomıkalyq keńistikke múshe memleketterdiń depýtattary, memlekettik organdardyń, bıznes-qoǵamdastyqtyń ókilderi qatysty. Atalǵan jıynda N.Aldabergenov temirjol jáne áýe kóligimen jolaýshylar tasymalynyń jol aqylaryn salystyrdy. Onyń aıtýynsha, «Transaero» áýekompanııasynda Máskeý-Astana (2290 km.) j»ne Máskeý-Qaraǵandy (2478 km.) reısterinde baǵa aıyrmashylyǵy eki eseden kóp – 61,7 myń teńge jáne 23,07 myń teńge. Al «Aeroflot» kompanııasy Máskeý-Qaraǵandy reısine 31,9 myń teńge tarıf belgilegen. Sondaı-aq, mınıstr Qazaqstan men Reseıdiń ishki jelilerindegi avıabıletteri tarıfterine de nazar aýdardy. Ol: «Qazaqstandyq áýebıletter edáýir joǵary ekeni kórinedi. Mysalǵa, SKAT kompanııasynyń Almaty-Taraz (470 km.) áýereısiniń baǵasy 17,49 myń teńge. Máskeý men Nıjnıı Novgorod arasyndaǵy shamamen osyndaı qashyqtyqqa reseılik jolaýshylar 11,6-dan 16,7 myń teńgege deıin tóleıdi. Aıyrmashylyǵy 33 paıyzǵa deıin jetedi», – dedi. N.Aldabergenovtyń sózine qaraǵanda, keıbir áýe joldaryndaǵy ushaq bıletteri sol baǵyttaǵy poıyzdyń kýpe vagonynyń baǵasynan arzanyraq bolyp shyqqan. Ol bul jaǵdaıdy ekonomıkalyq qısynsyzdyq dep esepteıtinin jetkize kele, bolashaqta áýe jáne temirjol tasymaldaryna biryńǵaı kóńilge qonymdy tarıf belgilenetinine senimin bildirdi. Joldybaı Bazar. Derekkóz: gazeta.kz. Foto: «QazAqparat».