Dáýlettiń qandaı myqty balýan ekenin jankúıerler jaqsy biledi. 96 jáne 125 kılo salmaq dárejelerinde kúsh synasqan ol erkin kúresten ótken kóptegen respýblıkalyq jáne halyqaralyq jarysta atoı saldy. 2008-2016 jyldar aralyǵynda Azııa chempıonatynda tórt kúmis jáne bir qola medaldy ıelendi. 2014 jyly Azııa oıyndarynda qandasymyzdyń jeńis tuǵyrynyń eń bıik satysyna kóterilýine tamasha múmkindigi boldy. Nebir myqty qarsylastardy jolynan yǵystyrǵan Shabanbaı fınalda Irannyń ataqty balýany Parvız Hadıdke ese jiberdi. Nátıjesinde jerlesimiz kúmis medaldy moınyna ildi.
2012 jyly Londonda alaýy tutanǵan Olımpııa oıyndaryn jap-jaqsy bastaǵan Dáýlet sheshýshi tusta utylyp, besinshi orynda qalyp qoıdy. Biraq arada birer jyl ótkennen soń bas júldeni oljalaǵan ózbekstandyq Artýr Taımazov pen kúmis júldeni ıelengen grýzııalyq Davıd Modzmanashvılıdiń dopıng qoldanǵany anyqtalyp, olar óz ataqtarynan aıyryldy. Sonyń nátıjesinde ırandyq Komeıl Gasemı men reseılik Bilál Mahovtyń ekeýi de Olımpııa oıyndarynyń jeńimpazy dep tanylsa, qazaqstandyq Dáýlet Shabanbaıǵa qola medal tabys etildi. Dál sondaı júldeni amerıkalyq Tervel Dlagnev te ıelendi. Osylaısha, araǵa 10 jyl salyp, ǵalamdyq dodanyń medaldary óz ıelerin tapty. Al qazaq jankúıerleri Dáýlet úshin dán rıza.
