Qylmyskerdi tabýǵa kómektesken janǵa qomaqty qarjylaı syı beriledi

AQTAÝ. 16 mamyr. Aqtaýda 8 jasar Asylbekti pnevmatıkalyq qarýmen oq atyp jaraqattaǵan adamdy áli tabylmaýda. Bul týraly egemen.kz tilshisi habarlady. Polıseıler adam atýdy «ermekke» aınaldyrǵan kúdiktilerdi tabýǵa kómek bergen janǵa qomaqty qarjylaı syı taǵaıyndalatynyn jarııa etti. Al Asylbekten buryn pnevmatıkalyq qarý oǵynan zardap shekken úsh adamnyń biri – 23 jastaǵy Konstantın Shýlga (sýrette). Taqyrypqa oraı jýrnalıstermen tildesken  ol polıseılerdiń sózin qýattap, qylmysker kórshi úıde emes, dál ózderi turatyn 22-shaǵynaýdandaǵy 6-úıde turýy múmkin degen joramal aıtady. Konstantın Shýlga: «Men de galereıaǵa temeki tartýǵa shyqqan edim. Sol sátte jańbyr jaýyp, kún kúrkirep, naızaǵaı oınaı bastady. Osy kezde meniń qulaǵym oqys aýyryp, shymyrlap ala jóneldi. Alǵashynda meni naızaǵaı soqty dep oıladym. Pnevmatıkalyq qarýdyń oǵyn tapqan soń ǵana ózime oq atylǵanyn túsindim», – dedi. Al Asylbektiń jaǵdaıy qazir jaqsy, kún sanap táýir bolyp keledi. Gúlaıym Shyntemirqyzy. Derekkóz: egemen.kz. Foto: egemen.kz.