Qasym-Jomart Toqaev qazaqstandyqtarǵa joldaǵan úndeýinde qazirgi bıliktiń ókilettigi bólinip, Prezıdenttiń keıbir quzyretteri Parlamentke berilgenin málimdedi.
«Májilis pen máslıhattar jańa aralas júıe boıynsha jasaqtalady. Depýtattardyń bir bóligi partııalyq tizimmen, qalǵany bir mandatty okrýgten saılanady. Konstıtýsııalyq sot qurylyp, aldaǵy qańtar aıynan jumys isteı bastaıdy. Adam quqyqtary jónindegi ýákil ınstıtýty konstıtýsııalyq mártebege ıe boldy. Bıliktiń birqatar ókilettigi qaıta bólinip, keıbir quzyretter Prezıdentten Parlamentke berildi», delingen úndeýde.
Memleket basshysy Konstıtýsııaǵa jer jáne onyń qoınaýy halyqqa tıesili degen jańa bap engizgenin atap ótti.
«Konstıtýsııaǵa jer jáne onyń qoınaýy halyqqa tıesili degen bap engizildi. Men osy erejeni júzege asyrý úshin «Ulttyq qor – balalarǵa» degen múlde jańa baǵdarlama usyndym», dedi Prezıdent.
Qasym-Jomart Kemeluly Konstıtýsııalyq reforma – júzege asyrylyp jatqan aýqymdy saıası jańǵyrý baǵdarlamasynyń ajyramas bóligi ekenin qadap aıtty.
«Osy baǵdarlama aıasynda beıbit jınalystardy ótkizý úshin aldyn-ala eskertý tártibi engizildi. Saıası partııalardy tirkeý rásimi jeńildetilip, tirkeýdiń qajetti shegi tómendetildi. Saılaý aldyndaǵy partııalyq tizimdi jasaqtaý jáne depýtat mandattaryn bólý kezinde áıelder men jastar úshin 30 paıyzdyq kvota engizildi. Saıası partııalardyń Májiliske ótý shegi 7-den 5 paıyzǵa tómendedi. Saılaý bıýlletenderine «bárine qarsymyn» degen baǵan qosyldy. Parlamenttik oppozısııa ınstıtýty quryldy. Qylmystyq kodekstiń 130-baby qylmystyq dep tanylmaıtyn boldy, 174-baby izgilendirildi. О́lim jazasy joıyldy. Aýyl ákimderin tikeleı saılaý tásilderi engizildi», delingen Prezıdent úndeýinde.
