Jaýapkershilik bárimizge júkteledi

Kez kelgen el óziniń tabıǵı baılyqtaryn durys paıdalana bilýi qajet. Elimizde ózen-kóldermen qatar Kaspıı teńizi de jatyr. Kaspıı teńizin qorshap jatqan bes memlekettiń qataryndamyz. Bul jaǵdaıdy da eskergen Prezıdent Trans­kaspıı halyqaralyq kólik baǵy­tynyń mańyzdylyǵy týra­ly sóz qozǵap, ony ári qaraı damy­typ, jahandyq logıstıka kompanııalarynyń ortaq iske qosylýy týraly aıtty.

Mańyzdy qujatta kóterilgen máseleniń biri – aýyl sharýa­shylyǵyn damytý. Bul salada biraz jumys atqaryldy. Qolǵa alynǵan aýqymdy is-sharalarǵa da kóp ýaqyt ótti. Alaıda óki­nish­ke qaraı, aýyz toltyryp aı­ta­tyndaı nátıjelerdi keıde kóre almaımyz. Aýyl sharýa­shy­lyǵy memleketimiz úshin árqashanda mańyzdy sala bolyp qala beredi. О́ıtkeni bul sektordyń turaq­ty damýy azyq-túlik qaýipsizdigi­ne tikeleı áser etetini týraly Mem­leket basshysy jıi aıtyp júr. Osyǵan oraı aýyl halqyna bólinetin sýbsıdııalar qaıta qaralyp, jańa baǵdarlamalar jasaýǵa jol ashyldy.

Qujatta erekshe mańyz berilgen taǵy bir baǵyt – zań jáne tártip. Memlekettiliktiń eń basty standarttarynyń biri zań ústemdigi bolsa, qoǵamda ornaıtyn tártip turaqtylyq pen qaýipsizdiktiń kepili bolyp sanalady. B.Momyshuly muny «Tártipke bas ıgen qul bolmaıdy» dep kesip aıtyp ketken. Qazaq jerinde zań jarǵylary ejelden qarastyrylǵan. Sonaý túrki zamanynda tasqa jazylǵan bitik jazýlaryna zer salsaq, damy­ǵan orta ǵasyrlarda Júsip Balasaǵun jazǵan «Qutty bilikte» memlekettegi eń basty máselelerdiń biri retin­de zań men tártip aıtylady. Mun­daı kózqarastardy ál-Farabı babamyzdyń eńbekterinen de kóp kezdestirýge bolady. Bul temirdeı tártip odan keıingi Altyn Orda, Shaǵataı uly­sy jáne Mońǵol memleketin­de de saqtaldy. Al Altyn Ordanyń izbasary bolatyn Qazaq handyǵyndaǵy Qasym hannyń «Qasqa joly», Esim hannyń «Eski joly», Táýke hannyń «Jeti jarǵysy» – HH ǵasyrdyń basyndaǵy zańdar jınaǵy táýelsizdik jyldary qurastyrylǵan zańdarymyzdyń qaınar kózi deýge bolady.

Joǵaryda qozǵalǵan másele­lerdi ári qaraı damytý halyqqa júkteledi. О́ıtkeni bir jaǵadan bas, bir jeńnen qol shyǵaryp, jaýapkershilikti jumyla kótergende ǵana Ádiletti Qazaq­standy birge qura alamyz.

Anar BAIMAǴAMBETOVA,

Qoljazbalar jáne sırek kitaptar ulttyq ortalyǵynyń bólim basshysy