Bir aı buryn jumysyn bastaǵan óner mektebinde úmitin úkilegen 100-den astam talapty bala bar. Dombyra, fleıta, qobyz, jetigen, sýret, vokal men akterlik sheberlik syndy birqatar úıirmede kishkentaı qaraǵandylyqtar ónerdegi talanttaryn ushtap, qanattaryn qataıtady. Úıirmede 6 jáne 16 jas aralyǵyndaǵy balalar dáris alyp júr. Búginde óner mektebi Taraz, Almaty, Qyzylorda men Shymkent qalasynda bar bolsa, keleshekte fılıaldy ár qaladan ashý josparda bar.
– Kıeli Saryarqa elinen «sen tur, men ataıyn» deıtin nebir júırikter shyqqan. Kúmiskómeı ánshiler, jeztańdaı jyrshylarymyz jeterlik. Ár eldiń, ulttyń tili, dini, dili, óz salt-dástúri bar. Onsyz ult bolý múmkin emes. Sonaý jyldary Almatyda úlken turǵyn úı kesheninde turdym. Sonda túrli balalardy kórdim. Qazaqylyǵymyzǵa, dástúrimizge jat dúnıelerdi kórdim. Júregim syzdady. Olarǵa toqpaqpen úırete almaıtynymyzǵa kózim jetti. Tek urpaqty ulttyq ónerge baýlý arqyly jeńetinimizdi túısindim de osy mektepti ashýdy uıǵardym, – deıdi Sáken Maıǵazıev.
Mekteptegi úıirmeler quny qarapaıym turǵyndardyń qaltasyna jeńil, oıǵa da qonymdy.
– Qaraǵandy óńirinde bul – jańalyq. Ánniń estisin aıtatyn, sahna óneriniń mádenıetin tanytatyn, ónerdiń bıiktigin kórsetetin qazaqtyń, Alashtyń bir uly – Sáken Maıǵazıev. Sáken mektebi – dástúrli ánderdi nasıhattaıtyn mektep bolaryna kámil senimdimin, – deıdi Kenshiler mádenıet saraıynyń basshysy Jarolla Aqyshev.
Qyzǵaldaq AITJANOVA,
«Egemen Qazaqstan»
QARAǴANDY
