Aýyl sharýashylyǵy mınıstri Erbol Qarashókeevtiń habarlaýynsha, bıyl aýyl sharýashylyǵy daqyldarynyń jalpy jınaý alańy 23,4 mln gektardy qurady. Onyń ishinde astyq jınaý alańy 16,1 mln ga quraıdy.
Onyń sózinshe, qolaıly jaǵdaılar egin jınaý naýqanynyń kóp bóligin úzilissiz ótkizýge múmkindik berdi. Nátıjesinde búgingi kúni respýblıka boıynsha barlyǵy 15,4 mln ga dándi jáne dándi-burshaqty daqyldar nemese jalpy egin jınaý alańynyń 96,3% jınaldy. Ortasha túsimdilik gektaryna 13,0 sentner kóleminde 20,1 mln tonna astyq bastyryldy.
Daqyldar bólinisinde qaraıtyn bolsaq, 12,6 mln gektar alqaptan bıdaı, 1,4 mln ga jerden maıly daqyldar, 164,5 myń gektardan kartop, 149,6 myń ga alqaptan kókónis daqyldary jınaldy.
Aýyl sharýashylyǵy mınıstri áleýmettik mańyzy bar daqyldardyń boljamdy jalpy jınalymy respýblıkanyń ishki qajettiligin qamtamasyz etýge múmkindik beretinin atap ótti. Osy jyldyń qolaıly jaǵdaılary eginniń sapasyna oń áser etti.
Sondaı-aq Aqmola oblysynyń ákimi Ermek Marjyqpaev, Qostanaı oblysynyń ákimi Arhımed Muhambetov, Soltústik Qazaqstan oblysynyń ákimi Qumar Aqsaqalov baıandama jasady.
Premer-Mınıstrdiń aıtýynsha, egin oraǵy aıaqtalyp qaldy. Túsim ortasha jyldyq kórsetkishten joǵary bolady dep kútilýde. Jalpy 18 mln tonnadan astam astyq jınaý josparlanýda.
«Endigi mindet – ónimniń sapasyn tómendetpeı, durys saqtaý. Sonymen qatar ishki suranysqa jáne eksportqa qajetti astyq kólemin naqty bólip qoıý kerek. Bıyl da Qazaqstan ózin astyqpen tolyqtaı qamtamasyz etti», dedi Álıhan Smaıylov.
Premer-Mınıstr ónimdiliktiń oń dınamıkasyn atap ótti. О́tken jyly orta eseppen gektaryna 9,8 sentner ónim jınalsa, bıyl 13 sentnerdi qurap otyr, bul 30%-ǵa joǵary.
«Bul da bolsa – dıhandarymyzdyń tynymsyz eńbeginiń jemisi. Osy iske atsalysqan aýyl eńbekkerlerin mol ónim jınaýymen quttyqtap, qajyrly eńbekteri úshin alǵys aıtamyz», dedi ol.
Premer-Mınıstr astyq jınaý jumystaryn tez arada tolyqtaı aıaqtap, astyqtyń sapaly saqtalýyn qamtamasyz etýdi jáne ony úzdiksiz tasymaldaý boıynsha sharalar qabyldaýdy tapsyrdy.
«О́ńir ákimderi ónimniń astyq qoımalaryna ýaqytyly qabyldanýyn turaqty baqylaýda ustasyn. Kelesi jylǵa qajetti astyq tuqymyn tolyǵymen qamtamasyz etý kerek», dep túıindedi Álıhan Smaıylov.
