«Saılaýdy ótkizýge 20,5 mlrd teńge qarastyrylǵan. Bul soma bekitildi, Úkimet rezervinen aqsha bólinip jatyr», dedi Erjan Birjanov jýrnalısterdiń suraqtaryna jaýap bere otyryp.
Vıse-mınıstr 16,8 mlrd teńge kólemindegi negizgi qarajat eńbekaqy tóleýge jumsalatynyn naqtylady.
«Jergilikti jerlerde saılaý ýchaskeleri qurylady. Al jalaqy eń tómengi úsh aılyq jalaqydan kem bolmaýy tıis, bul - 180 myń teńge», dep túsindirdi Erjan Birjanov.
Buǵan deıin habarlanǵandaı, QR Ortalyq saılaý komıssııasy «Memleket basshysynyń kezekten tys saılaýynda Qazaqstan Respýblıkasy Prezıdenttigine kandıdattyń respýblıkalyq bıýdjet qarajatynan óteletin shyǵystarynyń mólsherin belgileý týraly» qaýly qabyldaǵan edi.
Qujatqa sáıkes, Qazaqstan Respýblıkasynyń Prezıdenttigine kandıdat shyǵystarynyń mólsheri 10 312 600 teńge kóleminde belgilengen:
- Teledıdar jáne radıo boıynsha saılaý baǵdarlamalaryn usyný, sondaı-aq merzimdi baspa basylymdarynda 2 maqala jarııalaý - 9 012 600 teńge;
- Saılaý aldyndaǵy jarııa is-sharalardy ótkizý jáne úgit materıaldaryn shyǵarý - 800 000 teńge;
- Kólik shyǵyndary - 500 000 teńge.
