«Keshe Memleket basshysy Qasym-Jomart Toqaev Halyqaralyq shahmat federasııasynyń prezıdenti Arkadıı Dvorkovıchti qabyldady. Kezdesýde Prezıdent oqýshylar arasyndaǵy shahmat qozǵalysyn damytýdyń mańyzdy ekenine toqtaldy. Búgin Memleket basshysynyń tapsyrmasyn júzege asyrý aıasynda Halyqaralyq shahmat qaýymdastyǵynyń prezıdenti Arkadıı Dvorkovıchpen oqýshylar arasynda shahmat qozǵalysyn damytý boıynsha yntymaqtastyqty talqyladym.
Shahmatty nasıhattaý, oqytý ádistemesi, basqa elderdiń tájirıbesin zertteý, sondaı-aq muǵalimderdi daıarlaý máselelerin talqyladyq. Arkadıı Dvorkovıch pen Qazaqstan shahmat federasııasyndaǵy áriptesterimiz mınıstrliktiń bastamalaryn qoldap, balalardy shahmat ortasyna tartý jumystaryna atsalysýǵa daıyn ekenin jetkizdi», dep jazdy A.Aımaǵambetov Feısbýk paraqshasynda.
Onyń aıtýynsha, qazir mektepterde «Shahmat» fakýltatıv pánin engizý jáne shahmat boıynsha qosymsha seksııalardy ashý boıynsha belsendi jumys júrgizilip jatyr.
«Dene shynyqtyrý boıynsha úlgilik oqý baǵdarlamasynyń bólimine «Shahmat», «Toǵyzqumalaq» jáne t. b. oqý engizildi. Oqý jyly bastalǵaly beri shahmat tańdaý páni retinde 28 myńǵa jýyq balaǵa arnalǵan 654 mektepte engizildi. Al mektepterdegi shahmat seksııalarynyń sany 7 myńnan asyp, 60 myńnan astam bala olarǵa qatysýǵa múmkindik aldy. Bul jumysty ári qaraı da belsendi túrde damytýdy jalǵastyramyz.
Qosymsha bilim berý uıymdaryndaǵy balalardy da shahmat oınaýǵa úıretý máselesi umyt qalǵan joq. Onda balalarǵa arnalǵan 3,5 myńǵa jýyq shahmat úıirmesi qurylǵan», delingen jazbada.
Sondaı-aq ol shahmat qozǵalysyn damytý úshin kadrlarmen qamtamasyz etý máselelerine kóp kóńil bólinetinin aıtty. Búginde bul shekteýshi faktorlardyń biri.
«Biz federasııamen osy baǵytta jumys isteýge ýaǵdalastyq. Sondaı-aq oqý-ádistemelik quraldardy, arnaıy portaldy daıyndaý, shahmat týrnırlerin ótkizý jáne jattyqtyrýshylar men muǵalimderdiń biliktiligin arttyrý máseleleri talqylandy. Týrnırler men túrli jarystardy ótkizý mańyzdy. Bıyl shahmattan «Aqbozat» respýblıkalyq týrnıri ótedi. Oǵan elimizdiń barlyq óńirinen 2-11 synyp oqýshylary qatysady. Mektep lıgasy boıynsha jumystar júrgizilip jatyr», dedi ol.
Budan soń, mınıstr jergilikti atqarýshy organdardyń balalarǵa qosymsha bilim berýge arnalǵan memlekettik tapsyrysty ornalastyrýy úshin zańnamalyq norma bekitilgenin sóz etti.
«Biz úshin múmkindiginshe kóp balanyń shahmat sabaqtaryna qatysa alýy mańyzdy. Oqý oryndarynda barlyq qajetti shara qarastyrylǵan shahmatty damytýdyń arnaıy Jol kartasy daıyndaldy. Qazir qazaqstandyq shahmatshylardyń, ásirese, áıel shahmatshylardyń álemdik arenada óz orny bar. Jas urpaqtyń úlgi alar tulǵasy bar ekeni sózsiz. Olar - ataqty sportshylar Dınara Sádýaqasova, Jansaıa Ábdimálik, Bıbisara Asaýbaeva jáne t.b.
Bir kún buryn atyraýlyq 13 jastaǵy oqýshy Zarına Nurǵalıeva shahmattan eki dúrkin álem chempıony atandy. Ol Rýmynııada ótken álem chempıonatynda altyn medal jeńip aldy. Sondaı-aq taǵy 2 qazaqstandyq shahmattan álem chempıonatynyń jeńimpazy atandy. Olar - 18 jasqa deıingi uldar arasynda Qazbek Nógerbek kúmis jeńip alsa, 14 jasqa deıingi uldar arasynda Ańsat Aldııar qola júldeger atandy. Bolashaqta shahmattan Dúnıejúzilik olımpıadalarda oqýshylarymyzdyń esimderin birneshe ret estıtinimizge senimim mol», dep jazdy Oqý-aǵartý mınıstri.
