Almatyda «Qytaıdyń álemdik mura nysandary» halyqaralyq kórmesi bastaldy

Mýzeıde eki eldiń tatýlyǵyna  qyzmet etetin dıplomatııalyq is-sharalar sheńberinde túrli kórmeler men mádenı is-sharalar ótip jatady.  

Bul joly Memlekettik ortalyq mýzeıi QHR Bas konsýldyǵymen birlesip, Qytaı Halyq Respýblıkasynyń qurylǵan kúnine oraı, «Qytaıdyń álemdik mura nysandary» atty halyqaralyq fotokórmesiniń tusaýyn kesti.

Qytaı – qaıtalanbas tarıhı eskertkishteri saqtalǵan ejelgi órkenıet pen ózindik mádenıettiń eli. Bul eldiń tarıhı jádigerleri búkil adamzatqa ortaq eskertkish retinde ǵalamat aýqymymen tań qaldyrady. Oǵan qosa tabıǵat alýandyǵy da kórgen adamdy tánti etpeı qoımaıdy.

Sonymen «Qytaıdyń álemdik mura nysandary» kórmesinen IýNESKO-nyń búkilálemdik muralary tizimine engen Qytaıdyń tarıhı jáne mádenı eskertkishteriniń sýretteri oryn aldy.

Kelýshiler nazaryna «Uly Qytaı qabyrǵasy», «Imperator Sın Shıhýandıdiń qabiri men terrakotalyq músinder», «Ýdanshan taýlaryndaǵy ejelgi ǵımarattar kesheni», ejelgi Lıszıan qalasy, Sıýıfýdaǵy Konfýsıı ǵıbadathanasy, «Mogao úńgirleri», «Lýshan ulttyq parki», «Sýchjoý qalasyndaǵy klassıkalyq baqtar», «Daszýdyń jartastaǵy relefteri» sııaqty ǵalamat fotolar usynyldy.

Kórmege ejelgi órkenıettiń injý-marjandarynyń 59 astam fotosýreti qoıylǵan. Bul sýretterdi tanymal Qytaı fotograftary – Chjoý Szıanıen, Sýn Chjıszıýn, Tan Mın syndy talantty adamdar túsirgen.

Kórmeniń resmı ashylý saltanatynda eki eldiń dıplomatııalyq korpýsynyń ókilderi men qala jastary da qatysyp, QR Memlekettik ortalyq mýzeıiniń dırektory Rashıda Harıpova, Qytaı Halyq Respýblıkasynyń Bas konsýly Szıan Veı   sóz sóıleıdi.

«Ortalyq memlekettik mýzeıi árdaıym Qytaı elimen mádenıet almasýdy yqylaspen atqarady. Qytaıdyń aıtýly kúnderi men merekelerine jáne Qytaı men Qazaqstannyń qarym-qatynasyna arnalǵan taqyryptyq kórmeler ótkizý dástúrimizge aınaldy. Osy fotokórme QHR-dyń 73 jyldyǵy men Qytaı-Qazaqstan dıplomatııalyq baılanystarynyń 30 jyldyǵyna arnalyp otyr. Qazirgi tańda IýNESKO-nyń búkilálemdik mádenı muralarynyń tizimine Qytaıdyń 55 nysany engen. Bul jádigerler – Qytaı eline ǵana emes, búkil álemge, adamzat balasyna ortaq. Men osy kórmeniń arqasynda qazaqstandyq dostarymyz Qytaı týraly kóbirek bilip, adam jany men mádenıetin tildestire alatyn tamasha dıalog tabady dep úmittenemin», deıdi Qytaı Halyq Respýblıkasynyń Bas konsýly Szıan Veı  hanym.

Bas konsýl Szıan Veı  hanym osy 30 jylda eki eldiń barys-kelisi men alys-berisi yrǵaqty arnaǵa túskenin, ózara senim men dostyq baılanystar jańa beleske kóterilgenin ataı kele:

«Osydan eki apta buryn ǵana Tóraǵa Sı Szınpın Qazaqstanǵa memlekettik issaparmen keldi. Bul Qytaı basshysynyń pandemııadan keıingi alǵashqy sheteldik issapary ekijaqty baılanystardyń máni tarıhı mańyzdylyqqa ıe ekendigine aıǵaq bola alady. Osy oqıǵa barysynda eki memlekettiń basshysy «Qazaqstan – Qytaı: Myńjyldyqtardyń tildesýi» kórmesine bardy. Osy kórmedegi eksponattardyń bir bóligi QR Ortalyq memlekettik mýzeıi men óner mýzeıinen alyndy. Osynaý kórme kóshbasshylarymyzdyń mádenı-gýmanıtardyq áriptestikke úlken mán beretinine kýá bola alady.

Men barlyq kezde adamdardyń jan dúnıesin jaqyndatý elderdiń dostyq baılanystaryn nyǵaıtýda mańyzdy ról atqaratynyna senimdimin. Bas konsýl retinde de mańyzdy mindetim – eki halyqtyń túsinistigi men tatýlyǵyn bekemdeý. Jáne bul dıpkorpýstaǵy árbir áriptesime ortaq mıssııa. Keleshekte de Bas konsýldyq qazaqstandyq dostarymyzben birge munan da qyzyqty ári yntymaqtastyqqa múddeli tamasha merekelerge muryndyq bolýǵa daıyn», dedi Qytaı Halyq Respýblıkasynyń Bas konsýly Szıan Veı.

«Qytaıdyń álemdik mura nysandary» halyqaralyq fotokórmesi 12 qazanǵa deıin jalǵasady.