«Biz áli de sheteldik ınvestorlar úshin tartymdymyz. Álemde Qazaqstan halyqaralyq isterde jaýapty jáne óz damýynda iri progreske, ózara tıimdi yntymaqtastyqqa umtylatyn serpindi damýshy el retinde keńinen tanymal. Bul ásirese kúrdeli geosaıası jaǵdaı, jalpy arazdyq pen senimsizdik atmosferasynyń ósýi aıasynda óte mańyzdy», dep atap ótti Prezıdent.
Memleket basshysy jaqynda elimizde ótken Dinı kóshbasshylar forýmyna qatysqan Rım Papasy Fransısktiń Qazaqstan jaıly aıtqan jyly sózderin mysal retinde aıta ketti.
«Jaqynda Qazaqstanǵa kelgen Rım Papasy Fransısk óziniń ýaǵyzdarynyń birinde bizdiń elimiz «EO-nyń kezdesý jáne dıalog alańy» retinde kórinetinin, «álemniń beıbitshiligi men adamı baýyrlastyǵyn ilgeriletý isiniń qozǵaýshy kúshi» bolyp sanalatynyn aıtqan edi. Adamzattyń eń bedeldi rýhanı kóshbasshylary men pontıfıktiń bul sózderi Qazaqstandy óte jaqsy sıpattaıdy jáne bizdiń qundylyqtarymyzdy erekshe kórsetedi», dedi Qasym-Jomart Toqaev.
Prezıdent sondaı-aq elimizdegi saıası reformalar azamattardyń ıgiligi úshin qabyldanyp jatqanyn aıtty.
«Búgin bizdiń elimiz jańa saıası dáýirdi ashatyn óz tarıhynyń mańyzdy kezeńinen ótip jatyr. Bizdegi saılaý sıkliniń nátıjeleri elimizdiń damýy úshin sapaly jańa jaǵdaılar jasaıdy. Bir rettik Prezıdenttik merzim týraly normany bekitý elimizdegi shynaıy demokratııalyq dástúrlerdi nyǵaıtýdaǵy sheshýshi qadam boldy. Bul bılikti monopolııalaý áreketterine kúshti tosqaýyl qoıady jáne qabiletti, jaýapty saıasatkerlerdiń jańa tolqynynyń paıda bolýyna jaǵdaı jasaıdy. Jańartylǵan Konstıtýsııa negizinde barlyq negizgi saıası ınstıtýttar qaıta iske qosylady, barlyq azamattardyń ıgiligi úshin jumys isteıtin jańa ashyq jáne básekege qabiletti ekonomıkalyq júıe qalyptastyrylady. Biz úlken joldyń basynda ǵana turmyz», dedi Memleket basshysy.
