Ekibastuz – elimizdiń energetıkalyq ortalyǵy. Munda búkil Qazaqstandaǵy energııanyń 40 paıyzy óndiriledi. Kómirli shahardaǵy GRES-1 jáne GRES-2 stansalary Qazaqstannyń birtutas elektr energetıkalyq júıesiniń soltústik jáne ońtústik aımaǵynyń negizgi energııa kózderi bolyp sanalady. Atalǵan stansalar áldeqalaı «túshkirer» bolsa, ózge nysandardyń «tumaýratyp» qalatyny da sondyqtan. GRES-1 kásipornynyń bir ǵana energobloginiń táýliktik óndirisi (9,7 mln kVt/saǵ) Kókshetaý qalasyn 24 saǵat boıy jaryqpen qamtamasyz etýge jetedi eken. Stansalardyń qanshalyqty mańyzdy ekenin osydan-aq ańǵara berińiz. Al munda árqaısysynyń qýattylyǵy 500 MVt bolatyn 8 energoblok (ázirge jeteýi qatarda) jumys isteıdi. Osydan keıin pavlodarlyq kásiporyndar elektr energııasynyń donory ekenine eshkim shúbá keltire qoımas. Munyń sharapatyn kórshi memleketter de sezinip otyrǵanyn atap ótken jón.
Ekibastuz qalasyn áleýmettik-ekonomıkalyq damytýdyń 2025 jylǵa deıingi keshendi jospary ázirlenip, el Úkimetiniń aralasýymen qomaqty ınvestısııa tartylǵany belgili. Shahardy gúldendirý hám túrlendirý úshin salalardyń barlyǵy qamtylǵan. Onyń ishinde energetıka aldyńǵy qatarda tur. Energetıka baǵytynda kásiporyndardyń jeke qarajaty esebinen 2 ınvestısııalyq joba júzege asady dep josparlanyp otyr.
Osy oraıda Memleket basshysy Ekibastuzdaǵy kásiporyndardyń áleýetin erekshe atap ótip, jańǵyrtý jumystaryn jalǵastyrýdy tapsyrdy. Elektrenergetıkalyq júıemen qatar, kómir óndirý baǵytynda tyń tetikterdi iske qosýdy aıtty. Pavlodar oblysynyń, sonyń ishinde ekibastuzdyq kásiporyndardyń áleýeti zor ekenin eskersek, josparlanǵan jobalar nátıjeli júzege asady degen senim mol.
Serik SÁDÝAQASOV,
Pavlodar oblysy kásipkerler palatasynyń dırektory
