Qos tarap eki eldiń saýda salasyndaǵy yntymaqtastyqty ózara tıimdi jáne teń quqyly negizde damytýǵa járdemdesý nıetin bekitti. Atap aıtqanda, qujat shıkizattyq emes taýarlar men qyzmetter eksportyn damytý men ilgeriletýdi, saýda ınfraqurylymyn jetildirýdi, bırjalyq saýdany jáne elektrondyq kommersııany damytýdy, memlekettik jáne jeke sektorlar arasyndaǵy dıalogqa járdemdesýdi, isker toptardyń, qaýymdastyqtar men bıznes-qaýymdastyqtardyń ózara qyzyǵýshylyq týdyratyn máseleleri boıynsha yntymaqtastyǵyna járdemdesýdi jáne basqa da baǵyttardy aıqyndaıdy.
«Taýar aınalymyn ulǵaıtý jónindegi sharalar retinde bizdiń eksport qurylymyn ártaraptandyrýdy júrgizýge bolady dep sanaımyz. Orta merzimdi perspektıvada qazaqstandyq óńdelgen ónimniń Qatarǵa eksportyn $250 mln-ǵa deıin, onyń ishinde aýyl sharýashylyǵy taýarlary boıynsha $68 mln-ǵa deıin arttyra alamyz. Bizde Birikken Arab Ámirlikterine et pen sýbónimderdi jetkizýde oń tájirıbe bar. Biz Qatar naryǵyna et jáne et ónimderin eksporttaýdy arttyrýǵa daıynbyz», dep atap ótti Serik Jumanǵarın.
Sonymen qatar standarttaý, sáıkestikti baǵalaý jáne metrologııa salasyndaǵy yntymaqtastyqty halyqaralyq qaǵıdattar men normalar negizinde nyǵaıtý maqsatynda QR Saýda jáne ıntegrasııa mınıstrligi men Katardyń standarttaý jónindegi bas uıymy arasynda ózara túsinistik týraly memorandýmǵa qol qoıyldy.
Aıta ketsek, Qazaqstanda halyqaralyq standarttarǵa negizdelgen jáne álemdik jetekshi halal ónimder naryǵyna baǵdarlanǵan sapa ınfraqurylymynyń jańa júıesin qurý búgingi tańda BAÁ elderimen saýda salasyndaǵy mańyzdy mindetterdiń biri bolyp sanalady. 2022 jyly qyrkúıekte QR Saýda jáne ıntegrasııa mınıstrliginiń «KazStandart» halal ónimderin sertıfıkattaýdy júrgizý úshin BAÁ halyqaralyq akkredıtteý ortalyǵynan akkredıtasııa aldy. Bul Qazaqstannyń eksporttyq áleýetin iske asyrýǵa jáne Parsy shyǵanaǵy elderiniń naryǵyna qaýipsiz jáne sapaly ónim jetkizýge múmkindik beredi.
