FIRST Oqý-aǵartý mınıstrligi oqýshylar men muǵalimderge qatysýǵa usynǵan olımpıadalar tizimine kiredi. Robottehnıka chempıonaty – álemdegi eń bedeldi jarystardyń biri. Jarys jeńimpazdaryna álemniń jetekshi ýnıversıtetterine túsýge múmkindik beredi. Jenevada robottehnıkadan ótken «First global challenge» álem jarysynda jeńiske jetip, rekord ornatý – ekiniń biriniń qolynan kele bermeıtin is. 167 eldiń jasóspirimderimen synǵa túsip, eń kóp upaı jınaǵan qazaqstandyq oqýshylarmen Oqý-aǵartý mınıstri Ashat Aımaǵambetov telefon arqyly baılanysqa shyǵyp, jeńisterimen quttyqtady.
«Oqýshylarymyzdy jetken jetistikterimen quttyqtaımyn! Aldaǵy ýaqytta da bıik belesterdi baǵyndyra berýge tilektespin! Respýblıka kúni qarsańynda bizdi jaqsy jańalyqpen qýanttyńyzdar. О́z jetistikterińiz arqyly basqa balalardy yntalandyratyndaryńyzǵa senimdimin. Sondaı-aq qoldaý kórsetken muǵalimderge, jetekshilerge jáne daryndy balalardyń ata-analaryna alǵys aıtamyn», dedi mınıstr.
El namysyn ulttyq qurama atynan 15 pen 17 jas aralyǵyndaǵy 5 oqýshy qorǵap, olardyń barlyǵy FIRST Global Challenge ulttyq týrnıriniń jeńimpazdary atandy. Iаǵnı oqýshylarymyz úsh kún ishinde 16 oıyn ótkizip, eshqaısysynan múdirmeı, upaı sany boıynsha rekord ornatty. Chempıonattaǵy birinshi orynnan bólek, qazaqstandyq komanda basqa elderdiń komandalaryna kórsetken «Aıryqsha qoldaýy úshin» Al-Khwarizmi altyn medalin, sondaı-aq robotty jasaýdaǵy tamasha ınjenerlik sheshimderi úshin JUDGES AWARD arnaıy syılyǵyn da jeńip alǵanyn aıta ketken jón.
Oqý-aǵartý mınıstrligi balalardyń sıfrlyq bilimi men daǵdylaryn jetildirýine múmkindikter jasaýdy jalǵastyra beretinin, sońǵy úsh jylda elimizde 41 IT-mektep ashylyp, onda 55 myń bala oqyp jatqanyn jáne bilim alýshylarǵa arnalǵan arnaıy bilim berý baǵdarlamalary ázirlenip, olar da sıfrlyq bilimdi damytýǵa baǵyttalǵanyn alǵa tartady.
Prezıdent Qasym-Jomart Toqaev bilim berý salasyndaǵy sıfrlandyrýǵa erekshe kóńil bólgeni belgili. Iаǵnı IT-mektepterdiń ereksheligi – IT-tehnologııalar salasynda mamandaný, erte profıldeý, robottehnıka men baǵdarlamalaýdy tereńdetip oqytý, 3D modeldeý. Sondaı-aq jyl saıyn IT-mektepter sanyn kóbeıtý jóninde tapsyrmalar bergen bolatyn.
Oqýshylarymyzdyń bul jeńisi rasynda el jeńisi. Bıylǵy shilde aıynda ulttyq qurama brıtandyq FIRST Tech Challenge UK and Ireland maýsymnan tys eki olımpıadasyna qatysyp, jeńimpaz atanǵanyn aıta ketelik. Ol jarysta oqýshylarymyz 20 oıynnyń 19-ynda rekordtyq upaımen jeńiske jetip, jarystyń absolıýtti rekordyn ornatqan bolatyn. Sonymen birge balalarymyz qazylar alqasynyń úsh nomınasııasyna birden ıe bolǵan edi.
Bilektiń emes, bilimniń zamanynda álemdik deńgeıde rekord ornatyp, top jaryp júrgen oqýshylarymyz til-kózden aman bolǵaı. «Bilimdi urpaq – ult bolashaǵy» demekshi, egemendi elimizdiń erteńgi úmitin aqtaıtyn, táýelsizdigimizdi kóziniń qarashyǵyndaı saqtaıtyn bilimdi urpaq bolsa, mine, osyndaı bolýy kerek!
