Jıyn barysynda K.Másimov: «Reseı aldaǵy on jyldyqta yqpaldastyq máselesinde Batystan góri Qytaıǵa úlken mán beredi. Elimiz geografııalyq turǵyda Reseı men Qytaıdyń arasynda ornalasqan. Sondyqtan, Qytaıdan Reseıge, Reseıden Qytaıǵa baǵyt alǵan qalyń kóliktik aǵynnyń astynda qalamyz. Osy oraıda biz ózimizdiń geografııalyq jaǵdaıymyzdy tıimdi paıdalanýymyz qajet.
Sol úshin ornalasýymyzdy kapıtaldandyryp, turaqty ekonomıkaǵa ıe bolý úshin barlyq elderden ınvestısııalar tartýymyz kerek», – dedi. Sondaı-aq, ol jaqyn kúnderi Eýrazııalyq ekonomıkalyq odaqty qurý týraly shartqa qol qoıylatynyn jáne ol úderiske Qazaqstan da qatysyp jatqanyn atap ótti. Úkimet basshysy: «Eýrazııalyq ekonomıkalyq odaq sheńberinde Qazaqstan saıası turǵyda táýelsiz bolady. Biz Dúnıejúzilik saýda uıymyna enýge, Eýropalyq odaqpen áriptestik týraly kelisimge qol qoıýǵa, Qytaımen aradaǵy baılanysty ári qaraı tereńdetýge, sonymen qatar Eýrazııalyq ekonomıkalyq odaqtyń bir múshesi atanýǵa daıynbyz», – dedi.
Joldybaı Bazar. Derekkóz: «Qazaqstan jańalyqtary». Foto: i-news.kz.
