Integrasııa – táýekel emes, damý múmkindigi

Elbasy Nursultan Nazarbaev usynǵan HHI ǵasyrdaǵy eýrazııalyq ıntegrasııa – jańa, órkenıetti qarym-qatynastyń qalyptasýy men damýyna serpin beretin jańashyl qadam. Eýrazııalyq ekonomıkalyq odaq ıdeıasyn áleýmettik baǵdary naqtylanǵan memleketterdi qurýǵa múmkindik beretin joba degen senimmen qabyldaımyz. Eýrazııa keńistiginde ǵasyrlar boıyna birigý men bóliný úderisi almasyp otyrdy. Al Qazaqstan Prezıdenti Nursultan Nazarbaev jańa órkenıettiń damý baǵdarlamasyn usyna otyryp, osy eki úderistiń basyn qosty, bir arnada toqaılastyrdy. Onyń ıdeıasynda tarıhı ýaqyt pen jahandyq keńistik biriktirilip, turaqtylyq pen tynyshtyqty saqtaýǵa, eńsesin tiktegen elimizdi álemdegi alyp memleketterdiń qataryna qosýǵa negizdelip otyr. Elbasy bir sózinde aıtqanyndaı, bizdiń elimizde halyqtyń sany 17-aq mıllıon, naryǵymyzdyń tar ekeni belgili. Budan ári ósip-órkendeý úshin bizge kósile qanat qaǵatyn naryq keńistigi kerek. О́z tuty­ný­shylarymyzben shektelip qalatyn bolsaq, ekonomıkamyz óspeıdi. Sondyqtan da Memleket basshysy sanaly jurtqa uǵynyqty etip jetkizgenindeı «biz úshin ıntegrasııa degen oıyn emes, saıasat emes, ol – ómir». Jahandaný deıtin ómirdiń óz talabynan týyndaǵan zamanaýı úderis júrip jatyr. Bul, sóz joq, ekonomıkalyq áleýeti qalyptaspaǵan, rýhanı tiregi taıǵan elderdi jutyp jiberetin joıqyn mehanızm. Keleshegin oılaǵan memleketter ózara ekonomıkalyq keńistik aıasynda, resmı tyǵyz baılanystar men qarym-qatynastardy naqtylaý nátıjesinde bir múddege pátýalasyp, jahandanýdyń qurbandyǵyna emes, qaıta alyp mehanızmniń tetigine aınalýdy kózdep otyr. El dese eli, jer dese jeri, tarıhy men qazynasy tasyǵan Qazaqstannyń, halqyn tar kezeńge túsirmeı, tereń ózekke tuqyrtpaı, sara jolmen kósh bastaǵan Elbasy Nursultan Nazarbaevtyń ustanǵan búgingi baǵdary da jahandanýǵa jutylyp ketpeýge jasalǵan eren eńbek emes pe. «Bes saýsaq birdeı emes» demekshi, qoǵam bolǵan soń onyń ártúrli múshesi bar. Birdeńeni bilip sóıleıtin de bar, kisige erip, júrip sóıleıtin de bolady. Pıǵyly bólekterdiń turlaýsyz paıymy men ásire aıǵaıshyl áreketi qalyń qazaq, ańǵal jurtty adastyrmasa eken dep tileısiń. Kórshiles orys halqy óz prezıdentiniń mańaıyna birlesip búginde kúlli álemge óz yqpalyn júrgizýde, úlken saıasatqa óz múddesin ótkizýde. Kóp bop qorqytyp, tereń bop batyrǵandaı bul tirlik Reseıdiń uıysqan el, tutasqan qoǵam ekendigimen ózgege ses. Máseleniń baıybyna tereńdemesten bura tartatyn keı zamandastyń áreketin baıqaǵanda kóńiliń qulazyp, janyń jabyrqaıtyny da sodan. «Saıasatpen tek saıasatkerler aınalyssyn, ekonomıka týraly tek ekonomıst mamandar bas qatyrsyn» dep el taǵdyryna tikeleı baılanysty sát týǵandy syra salmaı, qoǵamnyń ár múshesi memleket bıligindegi azamattarymyzǵa qoldaý kórsetsek, ol halqymyzdyń saıası saýatynyń kóterilgeni, ulttyq rýhynyń óskeni bolmaı ma?! Halqymyz úshin janymyz ashıdy eken, nege halyqty uıystyrar sóz aıtpasqa. Ulttyń paıdasyn oılaǵan adam uly isterge qoldaýshy bolmas pa deısiń. Aıtpaǵym, keleshek urpaq, kemel el úshin búgin barsha qazaqstandyqtar bir múdde, bir tilektiń aıasynda bas qosyp, kúsh biriktirýimiz kerek. Jańa zamanǵa jasampaz qadamdy birge jasaıyq! Serǵazy IMAMBET, kartograf-ǵalym. ALMATY.