Meksıkanyń Gvadalahara qalasynda júlde qory 2 527 250 AQSh dollaryn quraıtyn týrnırdiń shymyldyǵy túrildi. Elimizdiń eń úzdik tennısshisi Elena Rybakına tusaýkeser kezdesýin Karolına Plıshkovamen ótkizdi. 30 jastaǵy Chehııanyń maqtanyshy kezinde álemniń birinshi raketkasy atanǵan. Ol US Open men Ýımbldonnyń fınalynda, Rolan Garros pen AQSh ashyq birinshiliginiń jartylaı fınalynda oınap, WTA týrnırlerinde 16 ret top jardy. Qazirgi kezde Plıshkova úzdikter tiziminde 20-oryndy ıelenýde. Osyndaı saqa sportshymen esh qaıymyqpaı aıqasqan Rybakına 7:6, 6:2 esebimen jeńiske jetti. Endi ekinshi kezeńde jerlesimiz álemniń 24-raketkasy amerıkalyq Djessıka Pegýlamen sheberlik baıqasady.
Astekter elinde esimderi joǵaryda atalǵan tennısshilerden bólek, Paýla Badosa (Ispanııa), Vıktorııa Azarenko (Belarýs), Marııa Sakkarı (Grekııa), Karolın Garsııa (Fransııa), Elena Ostapenko (Latvııa), Veronıka Kýdermetova (Reseı), Medıson Kıs pen Sloan Stıvens (AQSh), Bıanka Andreeský (Kanada), Belında Benchıch (Shveısarııa) jáne taǵy basqa tanymal oıynshylar baq synaýda.
Chılıdiń Kokımbo qalasynda bastalǵan jarysta Tımofeı Skatov saıysqa túsýde. Sońǵy bir jyl aralyǵynda qarqynyn kúrt kúsheıtken otandasymyz alǵashqy aınalymda ıspanııalyq Danıel Rıkonnan basym tústi – 7:5, 6:2. Al Iýlııa Pýtınseva Gvadalaharadaǵy dodanyń birinshi kezeńinde oıda joqta álemdik reıtıngte ózinen áldeqaıda tómen turǵan polshalyq Magdalena Freshke ese jiberdi – 3:6, 4:6. Sol sekildi Dmıtrıı Popko da sátsiz óner kórsetti. Ol Ekvadordyń Ambato qalasyndaǵy týrnırdiń tusaýkeser básekesinde argentınalyq Hýan Otegýıge jol berdi – 4:6, 5:7.
