Qazirgi tańda taraptar strategııalyq áriptestik týraly deklarasııa men Qazaqstan – Majarstan Strategııalyq keńesi sheńberinde ózara is-qımyldy jalǵastyryp keledi. Taraptar elderimiz arasyndaǵy ekijaqty saıası dıalogtiń mańyzdy baǵyty bolyp sanalatyn parlamentaralyq qatynastardy nyǵaıtý jáne jandandyrý máselelerine erekshe nazar aýdardy.
Sonymen qatar mádenı-gýmanıtarlyq ózara is-qımyl týraly áńgime barysynda túrki uıymdary aıasyndaǵy yntymaqtastyq máselesi de sóz boldy. Erlan Qoshanov halyqtarymyzdy tyǵyz tarıhı baılanystar, ulttyq mádenıet pen dástúrdi jańǵyrtý men saqtaýǵa degen umtylys biriktiretinin atap ótti. Sondaı-aq Palata Spıkeri Lorand Etvıosh atyndaǵy ýnıversıtette vengr tilin úırenýge nıetti qazaqstandyq stýdentter men qazaq tili kýrstaryna qatysatyn vengr jastarynyń sany artyp kele jatqanyn aıtty.
– Qazaqtyń bas aqyny jáne aǵartýshysy Abaı Qunanbaıulynyń shyǵarmashylyq murasy Majarstanda tanymal bolyp kele jatqanyna qýanyshtymyn. Sizdiń ulttyq mádenıetti, rýhanı damýdy, bilim berýdi qorǵaý jáne damytý týraly ıdeıalaryńyz, sondaı-aq «Lakıtelek» halyq ınstıtýty Abaıdyń aǵartýshylyq qyzmetimen jaqyn ekenin atap ótkim keledi, – dedi Májilis tóraǵasy.
Áńgime barysynda Erlan Qoshanov majar sportshylaryn 2024 jyly Qazaqstanda ótkizýi josparlanyp otyrǵan 5-shi Dúnıejúzilik kóshpendiler oıyndaryna qatysýǵa shaqyrdy.
Majarstan Memlekettik Jınalysy tóraǵasynyń orynbasary Majarstan Parlamenti tarapynan Qazaqstanmen barlyq salada yntymaqtastyqty damytý úshin qajetti qoldaý kórsetýge daıyn ekendigin aıtty.
– Biz úshin Qazaqstan men baýyrlas elder basty orynda turady. Týystyq jáne baýyrlastyq qarym-qatynas óte mańyzdy kapıtal bolyp sanalady, – dedi Shandor Lejak.
Majarstan Parlamentiniń Vıse-spıkeri Lakıtelek qalasynda majar Úkimetiniń granty boıynsha bilim alyp jatqan 300 qazaqstandyq stýdent týraly jyly lebizin bildirdi.
