Tolaǵaılar sherýi

Qazaq kúresinen Elbasy N.Á.Nazarbaev­­tyń júldesi úshin «Qazaq­stan barysy» týrnıriniń fına­lyna qaty­satyn barlyq balýandar anyq­­­taldy. Osyǵan oraı Almaty qala­syndaǵy respýblı­kalyq sport kolled­jiniń ǵımaratynda elimizdiń eń úzdik 33 balýanyn tanystyrý rásimi ótti. Almatydaǵy balýandar sherýine Sport jáne dene­shynyqtyrý isteri jónindegi agenttiginiń tóraǵasy Tastanbek Esentaev, «Samuryq-Qazyna» ulttyq ál-aýqat qory AQ qoǵammen baılanys departamentiniń dırektory Aıdar Mahmetov, «SK-Astana» KQ bas dırektory Erlan Darımov, «Astana» PKSK prezıdentiniń mindetin atqarýshy Iýrıı Melnıchenko, respýblıkalyq qazaq kúresi federasııasynyń bas hatshysy Sársen Quranbek, «KAZsport» telearnasynyń dırektory Dıas Ahmetshárip, «Qazaqstan barysy» qazaq kúresin damytý qory Qamqorlyq keńesiniń tóraǵasy Arman Shoraev, «Respýblıkalyq sport kolledji» RMQK dırektory Amalbek Tshanov qatysyp, úmitkerlerge sáttilik pen jeńis tiledi. Elimizdiń 16 aımaǵynda ótken respýblıkalyq doda­ǵa irikteý kezeńi óz máresine jetkeni málim. Uıym­­­­das­­tyrýshylardyń aıtýynsha, tórtinshi maýsymdaǵy irikteý syny kóptegen tosyn syılarǵa toly boldy. Atap aıtsaq, jarystyń ardager balýany Murat Keńtonov (Qostanaı oblysy) pen tuńǵysh «barys» Ulan Rysqul (Qyzylorda oblysy) fınaldyq synnan syrt qalsa, jaraqatyna oraı Maksım Gerber (Qostanaı oblysy) men Vıktor Demıanenko (Almaty qalasy) týrnırge qatysa almaıdy. Al tájirıbeli balýan Shalqar Jolamanov bir jyldyq úzilisten soń jobaǵa qaıta oraldy. Al «Shyǵys barysy», 2013 jylǵy jeńimpaz Aıbek Nuǵymarov pen «Taraz arlany» 2012 jylǵy chempıon Beıbit Ystybaev jobanyń fınaldyq synyna qatarynan tórtinshi ret joldama alyp otyr. Taǵy bir aıta keterlik jańalyq, bıylǵy jarysqa qatysatyn jas balýandar men buryndary kópshi­likke keńinen tanylmaǵan jańa esimder óte kóp. Tanys­tyrylym barysynda «Qazaqstan barysy» jobasynyń tórtinshi maýsymyna irikteý kezeńi qorytyndylandy. Esterińizge sala keteıik, «Qa­zaq­­­stan barysy» jobasynyń bıyl­ǵy fı­naldyq syny 29 maýsym kúni ­Asta­nadaǵy «Saryarqa» velotreginde óte­di. Jeńimpazǵa altyn belbeý, taı­tuıaq jáne 150 myń AQSh dollary tabys­ta­lady. Qanat ESKENDIR, «Egemen Qazaqstan». ALMATY.