Mánshúk mýzeıiniń astan-kesteńin shyǵardy

О́tken sársenbiniń beısenbige qaraǵan túninde Oral qalasynda adamnyń óńi túgil, túsine kire bermeıtin las ta jymysqy qylmys jasaldy. Tún qarańǵylyǵyn jamylǵan belgisiz bireý osy sátte Keńes Odaǵynyń Batyry Mánshúk Mámetovanyń memorıaldyq mýzeı-úıiniń terezesin syndyryp ishine kirip, bólmelerdiń astan-kesteńin shyǵarǵan. Ári mundaǵy eshqandaı balamasy men syńary jáne kóshirmesi joq tarıhı-mýzeılik asa qundy jádigerlerdi urlap ketken. Onyń ishinde 1891 jylǵy úlgidegi «Mosın» snaıperlik vıntovkasy, «KO» markaly karabın jáne mehanıkalyq patefon bar. Sonymen birge, álgi alaıaq osynda qoıylǵan qazaq halqynyń taǵy bir qaıratker uly, qaharmandar qalasy – Ordada qazaq­­­­tyń tuńǵysh atty ásker polkin qurýǵa atsalys­qan Hamıt Chýrınniń bylǵary rýletka-ólshegishin de oılanbastan jymqyrǵan. Qoldy bolǵan zattardyń ishinde «Samsýng» úlgisindegi zamanaýı baǵaly buıymdar da bar. Osy oqıǵaǵa baılanysty Batys Qazaqstan oblystyq ishki ister departamentiniń baspasóz qyzmeti taratqan jedel aqparat paraǵynda bul kezde kúzetshi túk bilmeı, túk sezbeı ári túk estimeı qan­nen-qapersiz qoryldap uıyqtap jatqany kórsetilgen. Ári ol mýzeı dırektorynyń uly bolyp shyqqan. Tún ishinde oryn alǵan soraqylyqty mýzeı qyzmetker­leri tańerteń jumysqa kelgende bir aq kórip, tek sodan keıin ǵana polısııaǵa habarlaǵan. Shaqyrý túsken­nen keıin tórt saǵat ishinde jasalǵan aıryqsha qyl­mys izi sýymaı ashyldy. Iаǵnı kúndizgi 14.00 shama­syn­da mýzeıdi tonaǵan qaraqshy oblys ortalyǵynda qolǵa tústi. Bul 1989 jyly dúnıege kelgen, buǵan deıin urlyq pen tonaýshylyqty kásip etip kelgen, ári osy qylmysy úshin jastyǵyna qaramastan bes ret sottalyp úlgergen azǵyn bolyp shyqty. Sonyń tórteýinde oǵan túzeý kolonııasynda keshirilim jasalyp, shartty túrde ýaqytynan buryn shyǵypty. Memleketimiz­diń osyndaı izgiligin túsine almaǵan oǵan endi ne deýge bolady? Tonalǵan mýzeılik qundylyqtar tabylyp keri qaıtaryldy. Urlyq jasaǵan jan qamaýǵa alyndy. Ol munda sottyń sheshimin kútetin bolady. Temir QUSAIYN, «Egemen Qazaqstan». Oral.