Qaraǵandy oblysy IID Uıymdasqan qylmysqa qarsy kúres departamentine advokattardyń biriniń zańsyz áreketi týraly aqparat kelip túsken.
Tártip saqshylarynyń aıtýynsha, advokat asa aýyr qylmystyq is boıynsha jábirlenýshi taraptyń múddesin qorǵaǵan. Al qylmys jasaǵan aıyptalýshy top sotta jalǵan jaýap berýi úshin qorǵaýshyǵa qomaqty qarajat bergen. Qorǵaýshy aıyptalýshy tarapynyń bul usynysyna kónip, arada deldaldyq qyzmet atqarǵan.
«22 qazanda 6,5 mıllıon teńge jáne 2,9 myń dollar kólemindegi qarajat aýdarylǵannan keıin Uıymdasqan qylmysqa qarsy kúres basqarmasy 36 jastaǵy advokatty ustady. Onyń kóligin tintý kezinde polıseıler taǵy 3100 dollar tárkiledi», dedi Qaraǵandy oblystyq polısııa departamenti bastyǵynyń orynbasary Ábil Ábildın.
Atalǵan fakti boıynsha QR Qylmystyq kodeksiniń 422-babynyń 4-bóligimen «Asa aýyr qylmys jasady dep aıyptaýmen baılanysty jalǵan aıǵaqtar berýge májbúrleý nemese para alý» boıynsha qylmystyq is qozǵaldy.
