Merekelik data kitaphanalardyń jumysyn jandandyryp, sala mamandarynyń bedelin arttyrý maqsatynda Mádenıet jáne sport mınıstrliginiń bastamasymen bekitildi. Saltanatty is-shara aıasynda Mádenıet jáne sport mınıstri Dáýren Abaev kitaphanashylarǵa «Mádenıet salasynyń úzdigi» tósbelgisin tabystady jáne Qazaqstan Respýblıkasy Mádenıet jáne sport mınıstriniń Qurmet gramotasymen jáne Alǵys hattarymen marapattady.
«Men elimizdegi 70 mıllıon dana kitap qoryna qamqorlyq tanytyp júrgen barsha kitaphanashylardy kásibı merekemen quttyqtaımyn. Meniń oıymsha, kiptaphana isiniń qajettiligine jáne kitaphana isiniń kúrdeliligine eshkim kúmán keltirmeıdi. Degenmen qoǵam arasynda «kitaphanalardyń ǵasyry aıaqtaldy, olardyń qyzmeti qaǵaz tasyǵyshtar dáýirindegi atavızm retinde eskiredi, ınternet pen sıfrlyq transformasııa arqasynda qoǵamdyq kitaphananyń ornyn bir ǵana smartfon basa alady» degen syndy teris pikirler bar. Men mundaı pikirmen túbegeıli kelispeımin. Jalpy, tehnologııaǵa kózsiz tabyný men sıfrǵa degen soqyr senim bizdiń urpaqtyń sanasyn qundylyqtarǵa tereń boılaýǵa múmkindik bermeı, adastyrady dep sanaımyn», dedi Dáýren Abaev.
Mınıstrdiń aıtýynsha, qazirgi zamanǵy kópshilik kitaphananyń fýnksıonaldyǵy kitaptardy saqtaý, júıeleý, sıfrlandyrý jáne oqyrmandarǵa usyný sheńberinen áldeqaıda kóp baǵytty qamtıdy. Bul rette MSM kitaphanalar jumysynyń jańa qaǵıdattary men standarttaryn kezeń-kezeńimen engizýmen aınalysýǵa daıyn.
«Kitaphana – bul bilimge úńilip, sanaly túrde, jaıly ortada oqýǵa keletin ǵıbadathana. Biz kúndelikti kúıbeń tirlik qarbalastan arylyp, rýhanııat álemine enýge múmkindik týǵyzatyn qasterli oryn. Sondyqtan biz kitaphana isin qoldaıtyn bolamyz. Bul bizdiń berik ustanymymyz», dep túıindedi mınıstr.
Aıta keteıik, elimizde 11 myńnan astam kitaphana jumys isteıdi. Onyń 7 myńnan astamy bilim berý júıesine tıisti bolsa, 3 myńnan astamy memlekettik kitaphana.
