Reseı Prezıdenti Eýrazııalyq odaqtyń qurylýyn jyldyń basty oqıǵasy dep sanaıdy

ASTANA. 26 mamyr. Keden odaǵy pen Birińǵaı ekonomıkalyq keńistikke qatysýshy elderdiń basshylary 29 mamyr kúni Astanada Eýrazııalyq ekonomıkalyq odaq qurý týraly qujatqa qol qoıady. Atalǵan kelisimniń mán-mańyzyna baılanysty kóptegen jaǵymdy pikirler aıtylýda. Bul týraly egemen.kz tilshisi habarlady. XVIII Sankt-Peterbýrg halyqaralyq ekonomıkalyq forýmynda Reseı Prezıdenti Vladımır Pýtın Eýrazııalyq ekonomıkalyq odaq jáne Eýropalyq odaq arasyndaǵy qarym-qatynasty damytý qajettigin aıta kele: «2015 jyldyń 1 qańtarynda Eýrazııalyq ekonomıkalyq odaq zańdyq turǵyda kúshine enýi tıis. Halqynyń sany 170 mln. adamdy quraıtyn Qazaqstan, Reseı, Belarýs memleketteriniń ortaq ekonomıkalyq naryǵy túziledi. Bul naryq arqyly kapıtal, taýar, jumys kúshi men qyzmet kórsetý salalary boıynsha erkin baılanysqa túsemiz. Kásipkerler úshin múmkindikter mol bolady. Sondaı-aq, birlesken ınvestısııalyq jáne kooperatıvtik jobalardy iske asyrýǵa, makroekonomıkalyq saıasat kelisimderin júrgizýge, syrtqy naryqty úılestirýge qol jetkiziledi», – dedi. Sondaı-aq, ol Eýrazııalyq ekonomıkalyq odaqtyń qurylýyn bıylǵy jyldyń basty jańalyǵy dep esepteıtinin atap ótti. Joldybaı Bazar. Derekkóz: egemen.kz. Foto: pia.ru.