Kúzet qyzmetin baqylaý bóliminiń bastyǵy Rýslan Danıarovtyń aıtýynsha, adamdardyń basym bóligi turǵyn úıdi qylmystyq qolsuǵýshylyqtan qorǵaý tásilderi týraly bile bermeıdi. Oblysta mundaı qyzmetti 14 jeke kúzet qurylymy kórsetedi eken. Olar qyzmetterin qoljetimdi etýge tyrysady, kóbi páterlerdi belgili bir merzimge kúzetke alýǵa daıyn, máselen, eńbek demalysy kezeńinde.
– Páter urlyǵynyń sanyn azaıtý – Soltústik Qazaqstan oblysy polısııa departamentiniń 2021-2023 jyldarǵa arnalǵan múlikti qorǵaý jónindegi baǵdarlamasynyń mańyzdy baǵyttarynyń biri. Ony júzege asyrý sheńberinde halyqpen aqparattyq jumys júrgiziledi. Qazirgi ýaqytta oblysta 1 173 páter men úı kúzetilýde, olardyń 1 151-i ortalyqtandyrylǵan baqylaý pýltine qosylǵan. Atalǵan obektilerde birde-bir páter urlyǵy tirkelgen joq, – dedi Rýslan Danıarov.
Krımınaldyq polısııa qyzmetkerleri Soltústik Qazaqstan oblysynda páter urlyǵynyń azaıǵanyn atap ótti. 9 aıdyń ishinde osyndaı 290 qylmys tirkelgen, onyń ishinde aýyr sanattaǵy (zańsyz kirýmen baılanysty) – 84. О́tken jyldyń uqsas kezeńinde 391 páter urlyǵy tirkelgen, onyń ishindegi 91-i aýyr sanatqa jatady. Urlyqtyń azaıýy – 25,8 paıyz, páter urlyǵynyń ashylýy 79,3 paıyzdy qurady. Polıseıler múmkindiginshe kásibı kúzetshilerdiń qyzmetin paıdalanýǵa, kóppáterli úılerdiń kireberisi men aýlalarda beınebaqylaý kameralaryn ornatýǵa, myqty qulyptardy paıdalanýǵa, birinshi qabattaǵy turǵyndarǵa terezelerge temir torlardy ornatýǵa keńes beredi.
