Astana Hub qatysýshylary 12 myńnan astam jumys ornyn usynyp otyr. Al IT-qyzmetter eksportynyń kólemi 82,6 mlrd teńgeni qurady. Sondaı-aq qatysýshy kompanııalar óz jobalaryna 172 mlrd teńge kóleminde qarjy tartyp, salyqtyq jeńildikterdiń nátıjesinde 47,6 mlrd teńge únemdegen.
– Astana Hub qatysýshylarynyń kirisi degenimiz – tehnoparktiń kirisi emes. Bul – tehnoparkte salyq jeńildikterin alyp otyrǵan 930 kompanııanyń kirisi. Bizdińshe, bul – óte jaqsy nátıje, Úkimettiń IT-salany yntalandyrý baǵytyndaǵy is-sharalarynyń oń kórsetkishi. Tehnologııalyq kásipkerlikti qoldaýdyń nátıjesinde sala qarqyndy damyp jatyr, – deıdi Astana Hub-tyń basqarýshy dırektory Baqytjan Eshmuhambetov.
Rasynda da, tehnopark qatysýshylarynyń sany jyldam ósip keledi. Máselen, jyl basynan beri 328 kompanııa qosylǵan. Bul rette úshinshi toqsanda tehnopark qatysýshylarynyń kiris kórsetkishi de 42 paıyzǵa ósken.
– 2022 jyldyń basynan beri IT-mamandar men IT-kompanııalardy kóshirýge degen suranys aıtarlyqtaı ósti. Bıyl 28 aqpannan beri tehnopark qonys aýdarý boıynsha 3 myńnan asa keńes berdi. Astana Hub múshesi retinde tirkelýge 142 ótinish túsip, onyń 117-si komıssııanyń oń qorytyndysyn alyp úlgerdi, – deıdi B.Eshmuhambetov.
Eske sala keteıik, Astana Hub qatysýshysy mártebesin alǵandarǵa kiristeriniń 1 paıyzyn tehnoparkke aýdarý mindeti júkteledi. Sondaı-aq tehnopark qatysýshylary tehnologııalyq kásipkerlikti nasıhattaý jáne jańa bastap jatqan startapshylardy baýlý úshin sheberlik synyptaryn, vorkshoptar men basqa da is-sharalar ótkizýge tıis.
