Mırat О́tepovtyń aıtýynsha, 2022 jyldyń birinshi jartyjyldyǵynyń qorytyndysy boıynsha Qordyń taza paıdasy 956 mlrd teńgeni qurady. Bul ótken jyldyń kórsetkishimen salystyrǵanda 18%-ǵa artyq. Spıkerdiń boljamy boıynsha, jyl sońyna deıin bul kórsetkish 1,85 trln teńgege jetedi.
Departament dırektory muny álemdik naryqtaǵy munaı qunynyń ósýimen baılanystyryp otyr. Taǵy bir mańyzdy faktor - Qordyń óndiristik emes shyǵyndardy ońtaılandyrý boıynsha atqarǵan jumysy. «Samuryq-Qazyna» ony kompanııalar tobynyń qyzmetkerlerine zııan keltirmeı ótkizedi. 2022 jyly olardyń jalaqysy tómen jalaqy alatyn laýazymdar men óndiristik personalǵa erekshe nazar aýdara otyryp 5-ten 48%-ǵa deıin kóterildi. Jalpy bul maqsattarǵa shamamen 340 mlrd teńge bólingen.
Paıdanyń ósýi aıasynda Qor Qazaqstandaǵy qaıyrymdylyq jobalaryna shyǵyndardy edáýir arttyrýǵa daıyn ekeni aıtyldy. Qazir «Samuryq-Qazyna» tobynyń barlyq kompanııalarynyń atynan qaıyrymdylyq qyzmetin Samruk-Kazyna Trust qory júzege asyrady. Onyń 2022 jylǵa arnalǵan bıýdjeti shamamen 10 mlrd teńgeni quraıdy, bul ótken jylmen salystyrǵanda 33%-ǵa artyq. Memleket basshysy Qasym-Jomart Toqaevtyń tapsyrmasyna sáıkes 2023 jyldan bastap «Samuryq-Qazyna» qory taza paıdanyń 7%-yn qaıyrymdylyq maqsattarǵa jumsaýǵa ázir. 2022 jyldyń qorytyndysy boıynsha bul soma shamamen 130 mlrd teńgeni quraıtyn bolady. Osylaısha Qordyń qaıyrymdylyq shyǵyndary 13 ese arta túspek.
Sondaı-aq brıfıng barysynda «Samuryq-Qazynanyń» memleketke tólemderi talqylandy. 2022 jyly Qor jalǵyz aksıoner retinde Úkimetke shamamen 170 mlrd teńge dıvıdend tóledi. Mırat О́tepovtyń aıtýynsha, Qazaqstandaǵy túrli áleýmettik jobalardy qarjylandyrý maqsatynda taǵy 141 mlrd teńge, qaıyrymdylyqqa 10 mlrd teńge jumsalady. Budan basqa «Samuryq-Qazyna» jyl saıyn QR bıýdjetine 1 trln teńgeden astam salyq tóleıdi, Qazaqstan boıynsha Qor tobynyń 250 myń qyzmetkeriniń jalaqysyn kóteredi, sondaı-aq búkil el boıynsha portfeldik kompanııalarǵa ınvestısııa salady.
«Samuryq-Qazyna» jumsaıtyn barlyq aqsha Qazaqstanda qalady, bizdiń ekonomıkamyzdy damytýǵa jáne azamattardy qoldaýǵa jumsalady», dep túıindedi M.О́tepov.
