О́tken aptanyń sońynda Qazaqstannyń áıelder quramasynyń bas bapkeri Shámil Safıýllın Parsy shyǵanaǵynda qaı shákirtterine senim artatynyn jarııa etti. Asa jeńil salmaqta Alýa Balqybekova baq synaıdy. Bıylǵy jyldyń mamyr aıynda Túrkııanyń Ystanbul qalasynda ótken álem chempıonatynda jerlesterimizdiń arasynan jalǵyz Alýa ǵana aqtyq synǵa deıin alqynbaı jetken edi. Sol jarysty Balqybekova kúmis medalmen qorytyndylady. 50 kılo salmaq dárejesinde Nazym Qyzaıbaı rıngke kóteriledi. Ol – ulttyq komanda sapyndaǵy eń beldi boksshylardyń biri ári biregeıi. Nazymnyń eki dúrkin álem jáne Azııa chempıony degen ataqtary bar. Dúnıejúzilik dodanyń taǵy bireýinde Qyzaıbaı qola medaldy moınyna ildi. Asa aýyr salmaqta Lázzat Kúngeıbaeva aıqasady. Ol 2016 jylǵy álem chempıonatynda top jarsa, 2014 jyly kúmiske qol sozdy. Lázzat buǵan deıin Azııa birinshiliginde tórt ret júldegerler qataryna qosylsa, byltyr altynnan alqa taqty. 75 kılo salmaqtaǵy Valentına Halzova da kezinde álemdik dodada daralanǵan.
54 kılo salmaqta synǵa túsetin Jaına Shekerbekova men 70 kılo salmaqta kúsh synasatyn Darıǵa Shákimovanyń 2016 jyly Rıo-de-Janeıroda alaýy tutanǵan Olımpııa oıyndarynda óner kórsetkenin jankúıerler jaqsy biledi. Ońtústik Amerıka saparynan Darıǵa qola medalmen oraldy. Onyń aldynda jerlesimiz Azııa birinshiliginde eki ret bas júldeni oljalady. Rıo Olımpıadasynyń shırek fınalynda súringen Jaına álem chempıonattarynda úsh ret jeńis tuǵyryna kóterildi. Al ózge salmaq dárejelerinde Jazıra Oraqbaeva (52 kılo), Rımma Volosenko (60 kılo), Aıda Ábikeeva (63 kılo), Mádına Nurshaeva (66 kılo) jáne Gúlsaıa Erjan (81 kılo) sharshy alańǵa shyǵady.
Esterińizge sala keteıik, byltyr BAÁ-niń Dýbaı qalasynda uıymdastyrylǵan Azııa chempıonatynda Qazaqstan quramasy 8 altyn, 1 kúmis jáne 1 qola medal ıelenip, jalpykomandalyq esepte jeke-dara kósh bastaǵan edi. Tarqatyp aıtsaq, Alýa Balqybekova (48 kılo), Nazym Qyzaıbaı (51 kılo), Dına Jolaman (54 kılo), Rımma Volosenko (60 kılo), Mılana Safronova (64 kılo), Valentına Halzova (69 kılo), Farıza Sholtaı (81 kılo) jáne Lázzat Kúngeıbaeva (+81 kılo) bas júldeni oljalasa, Vladıslava Kýhta (57 kılo) kúmis aldy. Al Marına Volnova (75 kılo) qola medaldy moınyna ildi.
Al Qazaqstannan keıingi ekinshi jáne úshinshi satyǵa О́zbekstan (1 altyn+5 kúmis+2 qola) men Úndistan (1+3+6 qola) quramalary jaıǵasty. Sondaı-aq júlde alǵan memleketter qatarynda Indonezııa (0+1+0), Mońǵolııa (0+0+3), Tájikstan (0+0+2), Fılıppın (0+0+1), Shrı-Lanka (0+0+1), Kýveıt (0+0+1) jáne BAÁ (0+0+1) komandalary bar.
