KIIKTERDIŃ TÚBINE JETKEN – PASTERELLEZ

О́tken aptada shalǵaıdaǵy Jánibek aýdany Jaqsybaı aýylynyń shyǵysynda orna­las­qan Aıdarly eldi mekeni tusynda dala erkesi – kıik­terdiń qyrylǵany Aqjaıyq óńiri jurtshylyǵyn qatty alańdatty. Sońǵy derekterge qaraǵanda ajal qushqan aq­bó­kenderdiń sany 3271 basqa jetken. Onyń deni – analyq eshkiler. Sonymen birge atalǵan aýyl turǵyndaryna qarasty bir jasqa jaqyndaǵan alty buzaý da jer jastanǵan. Oqıǵa oryn alǵan jerge Batys Qazaqstan oblysynyń ákimi Baqtyqoja Izmuhambetov pen tosyn jaǵdaıǵa oraı As­tanadan arnaıy kelgen  Aýyl sharýashylyǵy mınıstrligi Orman jáne ańshylyq sharýa­shy­lyǵy komıtetiniń tóraǵasy Erlan Nysanbaev bastaǵan jumys toby tikushaqpen shu­ǵyl attanǵan bolatyn. Osyndaı  oqıǵa oryn alǵany belgili bolǵannan keıin arnaıy komıssııa qurylǵan edi. Osy jedel jumys toby qa­zir óziniń alǵashqy qory­tyn­dylaryn shyǵardy. Olar jo­ǵaryda sandary kórsetilgen kıikter men buzaýlardyń óli­mi­ne dýshar etken – pasterel­lez aýrýy dep taýyp otyr. Mundaı dıagnoz ázirge bir bas buzaýdan anyqtalǵan. Degen­men mamandar qalǵan buzaý­lar­dyń da túbine jetken osy aýrý ekenine kúmán keltir­meıdi. – Bul haıýanattar arasyn­da kezdesetin juqpaly aýrý­lardyń biri. Kıikter arasynda onyń ótkir túri taraǵan dep aıta alamyz. Bul qorytyndy ólgen kıikterdiń ishki qury­lysynan alynǵan synamalar men saraptamalardan keıin belgili boldy. Al topyraq pen shóp­tiń, sýdyń quramyn tek­serý jumystary odan ári jalǵasýda. Osylardyń tolyq qorytyndylary shyqqan kezde bul aýrýdyń kıikterge qaıdan juǵyp, qalaı taraǵanyn aıtyp berýge bolady, – dedi gazet tilshisine oblystyq aýmaqtyq ınspeksııanyń aýmaqta mem­le­kettik veterınarlyq-sanı­tar­lyq baqylaý uıymdastyrý bó­liminiń bas mamany Farýh Mu­qanov. Pasterellez juqpaly, mal, haıýanattar aýrýlary tiziminde bar. Biraq Úkimettiń qaýlysy boıynsha bekigen ótemaqy tólenetin tizimde joq. Sondyqtan alty buzaýdyń ıesine ótemaqy tólenbeıdi, – dedi ol odan ári. Qazir kıikter ólgen aýmaq­ta profılaktıkalyq is-shara­lar júrgizilýde. Oǵan arnaıy shekteý jarııalanǵan. Onyń merzimi eń az degende bir aı. Osy ýaqyt aralyǵynda bul aımaqqa syrttan mal kirgizýge nemese shyǵarýǵa tyıym saly­nady. Sondaı-aq mal azyǵyn ázirlep tasymaldaýǵa da ruqsat joq. Joǵaryda aıtylǵandaı, bú­ginde shalǵaıdaǵy Aıdarly aýy­lynda kıikterdiń qyry­lýyna baılanysty qurylǵan komıssııa óz jumysyn  jal­ǵastyrýda. Temir QUSAIYN, Batys Qazaqstan oblysy, Jánibek aýdany.