Jıyn barysynda áýe bıletteri baǵasyn belgileý máselesi negizgi áńgime ózegine aınaldy. Búginde jol júrý qujatynyń quny halyq arasynda eń jıi talqylanatyn ári úlken mańyzǵa ıe máseleniń biri ekeni daýsyz.
Azamattyq avıasııa komıteti tóraǵasynyń orynbasary Saltanat Tompıevanyń sózine súıensek, bıyl áýe tasymaldaý salasynda jolaýshylar aǵyny ótken jylmen salystyrǵanda edáýir artqany baıqalady.
– Jyl saıyn jolaýshylar aǵyny kórsetkishi shamamen 10 paıyzǵa ósip keledi. Máselen, otandyq avıakompanııalar 2022 jyldyń alǵashqy 8 aıynda ishki jáne halyqaralyq baǵyttar boıynsha 6,9 mln adam tasymaldaǵan. Bul ótken jyldyń sáıkes kezeńimen salystyrǵanda 11 paıyzǵa joǵary. Al pandemııaǵa deıingi, ıaǵnı 2019 jylǵy kórsetkishten 23 paıyzǵa artyq. 2021 jyly ishki naryqtyń ózinde 7,5 mln adam tasymaldandy. Bul kórsetkish aldyńǵy jyldarmen salystyrǵanda 64 paıyzǵa kóp, – deıdi S.Tompıeva.
Basqosý barysynda qazaqstandyq avıakompanııalar qoldanystaǵy áýe bıletteriniń tarıftik baǵamdary men baǵa belgileý mehanızmin tanystyrdy. Atap aıtqanda, Air Astana bıletterdiń 73 paıyzyn tómen jáne orta tarıf boıynsha satylymǵa shyǵarady. Kompanııa ókilderiniń aıtýynsha, jol júrý qujattarynyń baǵasy jyl basynan beri kóterilmegen.
Sonymen qatar jıyn barysynda halyqaralyq jáne ishki baǵyttar boıynsha bir shaqyrymǵa belgilengen joǵary jáne tómengi shektegi tarıfterdi belgileý saıasaty talqylandy. Belgili bolǵandaı, bul taraptaǵy qazaqstandyq tasymaldaýshylardyń tarıf quny sheteldik avıakompanııalarmen salystyrǵanda edáýir tómen eken.
Mamandardyń aıtýynsha, bılet baǵasy naqty baǵyttar boıynsha suranys pen usynystan, maýsymdyq jáne táýliktik suranystyń aýytqýynan, bılet satyp alý kezindegi borttaǵy júktemeniń artýynan aıqyndalady jáne belgilenedi. Sondaı-aq onyń quny aeronavıgasııalyq jáne áýejaıdaǵy túrli qyzmetterden, avıa janarmaı men amortızasııalyq shyǵyndardan quralady.
Onlaın formattaǵy basqosý barysynda Azamattyq avıasııa komıteti ókilderi bılet satatyn saıttardaǵy qazaqstandyq avıakompanııalardyń halyqaralyq jáne ishki baǵyttardaǵy jol júrý qujatynyń baǵasyna salystyrmaly taldaý jasady. Taldaý barysynda Astana – Almaty baǵytyndaǵy 30 qazandaǵy áýe bıletiniń quny 17 500 teńge men 47 800 teńge aralyǵynda ekendigi belgili boldy. Al Air Astana kompanııasynyń Astana – Ystanbul – Astana baǵytyndaǵy 2 jáne 9 qarasha kúnderdegi bılet baǵasy 274 myń teńgeni qurap otyr. Bul sáıkes data men sáıkes baǵyttaǵy ózge sheteldik áýe kompanııasynyń bılet baǵasynan eki ese tómen.
О́z kezeginde Air Astana ókilderi bılet baǵasyn tómendetý baǵytynda júzege asyrylyp jatqan sharalar jaıynda aıtty. Atap aıtqanda, olar ushaqtardy tehnıkalyq qyzmet kórsetý jáne bortserikter men pılottardy oqytý ortalyqtaryn ashý kózdelip otyrǵanyn jetkizdi. Sonymen qatar jyldyń sońyna deıin avıakompanııa parki taǵy úsh jańa ushaqpen tolyqpaq. Osy rette aıta keterligi, Air Astana tamyz aıynda Airbus tıptegi 4 áýe kemesin alǵan bolatyn.
Búginde áýe bıletteriniń baǵasy arnaıy rettelmeıdi, avıa tasymaldaýshylar dınamıkalyq baǵa belgileýdi qoldanady. Bylaısha aıtqanda, bıletterdiń quny naryqtaǵy suranysqa qaraı avtomatty túrde retteledi. Eger de Kásipkerlik kodekstiń talaptaryna sáıkes básekelestikti qorǵaý boıynsha el zańnamasy buzylǵan jaǵdaıda monopolııaǵa qarsy den qoıý sharalary qoldanylatyn bolady.
