Qostanaı oblysy ákimdiginiń qurylys, sáýlet jáne qala qurylysy basqarmasynyń basshysy Berik Tańjaryqovtyń aıtýynsha, jobada septıkterdi ornatý qarastyrylmaǵan, osyǵan baılanysty merdigerler esebinen ýaqytsha septıkter oryndalǵan.
«Aýa raıynyń buzylýy men jaýyn-shashynnyń saldarynan turǵyn úılerdiń aýmaǵynda sýdyń jınalýy baıqalady», dedi ol.
Basqarma basshysy atap ótkendeı, ınjenerlik-geologııalyq zertteýlerge sáıkes úılerdiń irgetasy ylǵaldan qorǵalǵan, ıaǵnı úılerdi sý basý qaýpi joq.
Berik Tańjaryqov qazirgi ýaqytta úı mańyndaǵy aýmaqta sý aıdaý jumystary júrgizilip jatqanyn atap ótti.
Sondaı-aq ol turǵyn úılerdiń jeke kárizine jobalaý-smetalyq qujattama ázirlenip jatqanyn habarlady.
«Jobalaý-smetalyq qujattamany ázirleý aıaqtalǵannan keıin qurylys-montaj jumystary oryndalady», dep qosty B.Tańjaryqov.
Áýlıekóldegi jańa úılerdiń turǵyndary tolyp ketken septıkterdiń sýretterin jergilikti buqaralyq aqparat quralyna jibergen. Olardyń aıtýynsha, jańa úılerdiń kiltteri tapsyrylǵan kúnnen bastap nebári 10 kún ótken.
Buǵan deıin Qostanaı oblysynyń ákimi Arhımed Muhambetov Memleket basshysynyń sheshimi boıynsha turǵyn úı qurylysyna 2,3 mlrd teńge, onyń 600 mln teńgesi ınjenerlik kommýnıkasııalardy salýǵa baǵyttalǵanyn aıtqan edi. Jańa úıler 12 qurylys uıymynyń kúshimen turǵyzylǵan. Osylaısha, qysqa merzimde biryńǵaı arhıtektýralyq stılde 91 úı salyndy.
