Úshem dúnıege keldi

Sońǵy jyldary elimizde úshem­der­diń dúnıege kelýi qalypty qu­by­lysqa aınala bastaǵan sekildi. Derekterge súıensek, 2020 jyly 43 úshem dúnıege kelse, 2021 jyly dúnıe esigin aıqara ashqan úshem­der­diń sany – 45.

Jaqynda oblystyq kópsalaly aýrýhananyń perınataldyq blogynan Jalpaqtóbe aýylynda tu­ratyn Abdýllaevtar otbasy sha­ńy­raqtaryna úlken qýanyshpen oraldy. Bir emes úsh birdeı arýdyń ákesi atanǵan Álınur Abdýllaev sýpervaızer bolyp eńbek etse, anasy Úmıda Áshirova – zerthanashy. Buǵan deıin Aılaný jáne Amelııa esimdi qyzdardy dúnıege ákelgen anasy birden úshemniń anasy atanam dep oılamasa kerek. Osylaısha, otbasy búginde bes baldyrǵannyń qyzyǵyna toımaı júr.

Úshem qyzdar merziminen buryn, ıaǵnı júktiliktiń 35-aptasynda dúnıege keldi. Olardyń biriniń salmaǵy 1 980 gramm bolsa, ekin­shisiniki – 2 120, úshinshisiniki 2 020 gramǵa jetken. Sheksiz qýa­nysh­qa kenelgen otbasy qyzda­rynyń esim­derin Aılın, Alııa jáne Alıf dep qoıypty.

Shala týǵan nárestelerdi tekserý, kútip-baptaý jumystary qyz­metkerler tarapynan der ke­zinde qolǵa alynǵan. Iá, aýrýhana qyz­metkerleri bul jumysqa ju­dy­ryq­taı jumylǵan. Áýelde neonatologııa bólimine aýystyrylyp, sábılerdiń jaǵdaıy tolyq, jan-jaqty zerdelengen. Nátıjesinde, úshemniń densaýlyǵyna eshqandaı qaýip tónbegeni naqtylanǵan.

Jalpy, Jambyl oblysynda sońǵy úsh aıdyń bederinde ekinshi ret úshem dúnıege keldi. Buǵan deıin tamyz aıynda Maqsat Erimbetov pen Aıtkúl Qydyrbaevanyń otbasy Káýsar, Sezim, Úmitim esimdi úsh birdeı arýdyń ata-anasy atanǵan bolatyn.

Jambyl oblysy