Sýretterdi túsirgen Iýrıı Bekker
Turbaı Muratbektiń alǵashqy jeke kórmesi SÚR-AQ dep atalypty. Avtordyń paıymynsha, bul ataý birneshe maǵynany bildirse kerek. «Sur jáne aq tústerdiń qosyndysy bizdiń sur ómirimizge aq boıaýdy qosý bolsa, ekinshi maǵynasy taǵdyr jolynda aldymyzdan shyǵatyn jaýaby joq suraqtar» deıdi sýretshi. Sanaǵa salmaq salǵan san alýan saýaldardyń sheshimin óz keıipkerleriniń obrazdary arqyly kórsetkisi keletin ol, baıa-shaıa tirshiliktiń batpaǵyna batqysy kelmeı ádilet izdegen taza kóńildiń janaıqaıyn beıkúná jetkinshektiń janary arqyly beredi. Keskindemedegi beıneler tiri, adamdardyń kóńil kúıi, tabıǵaty shynaıy sezimderge toly.
Ekspozısııaǵa sýretshiniń otyzǵa jýyq kestesi qoıylǵan. Olar túrli ádis-tásilderde, birqatary aralas tehnıkada, al basym bóligi Muratbektiń ınemen keskindeme jazýdyń ózi oılap tapqan jańasha avtorlyq tásilinde oryndalǵan. Kestelengen týyndylar beıneleý jáne sándik-qoldanbaly ónerdiń erekshelikterin biriktire otyryp, sýretshiniń názik kórkemdik talǵamy men joǵary sheberligin pash etedi.
– Týǵan ápkem Aıjan ónerime kóp áser etti. Ol toqyma bóliminiń kásibı mamany, áıgili Raýshan Bazarbaevanyń shákirti. Onyń shyǵarmashylyǵyn kórip óstim, jipterdi alýan tústerge boıaýǵa, olardy oraýǵa kóp kómektestim. Shyǵarmashylyq jolymdy sándik óner men grafıkadan bastaǵanymmen, keskindeme janyma báribir jaqyn boldy. Búgingi shyǵarmashylyq jumystarym keste men keskindemeniń birigýinen týyndaǵan. О́mirdiń ár sátin araıǵa bóleıtin qýatty kúsh – meıirim men mahabbat. Adamdardyń bolmysynan sony izdeımin, – deıdi Turbaı Muratbek.
О́zegi ejelgi órkenıetpen qabysyp jatqan keste tigý óneri jańa sıpatta damyp, salttyq-mıstıkalyq mánmen qatar kórermenge estetıkalyq áser syılaıtyn aıryqsha janr retinde qalyptasty. Muratbek keste tigýdi tek qolóner dep ataý jetkiliksiz, bul adamzatty túrlendiretin, qýanysh pen shattyq syılaıtyn sıqyr dep sanaıdy. Onyń qoltańbasyna zer salǵan ónertanýshylar da osy oıdy qýattaıdy.
«Árbir kestelengen týyndy ıntererge sán berýshi qural ǵana emes, qandaı da bir shaǵyn oqıǵa nemese sýretshi ómiriniń kórinisi. Osy oraıda avtor óziniń rýhanı álemine tán, garmonııa men jylýlyqqa toly otbasy, balalar, tabıǵat álemi («Kıe», «Uıa», «Samǵaý», «Kıeli aǵash») jáne kúndelikti tynysh ómir («Kir», «Baqtashy bala») sıýjetterine quralǵan kúrdeli kompozısııalardy jasaıdy. «Balmuzdaq», «Bastaý», «Jańalyq», «Shóbere» jáne «Tań» týyndylary jumysty oryndaýdaǵy dáldigimen jáne zergerlik uqyptylyǵymen tańǵaldyrady, tipti qanshalyqty jaqyn qarasań da, tigis izderin baıqaı almaısyń. Beınebir túrli tústi jiptermen emes, boıaýlarmen salynǵan sekildi áser qaldyrady», deıdi kórme jetekshisi, ónertanýshy Samal Mamytova.
Aıta keteıik, Turbaı Muratbek 1986 jyly Almaty qalasynda dúnıege kelgen. 2006 jyly O.Tańsyqbaev atyndaǵy Almaty sándik-qoldanbaly óner kolledjin, 2011 jyly T.Júrgenov atyndaǵy Qazaq ulttyq óner akademııasyn támamdady. 2012-2016 jyldary Túrkııanyń Ankara qalasynda Gazı ýnıversıtetinde taǵylymdamadan ótken. 2021 jyly Qazaq ulttyq óner ýnıversıtetiniń «stanokty keskindeme» mamandyǵy boıynsha magıstratýrasyn bitirdi. 2009 jyldan beri respýblıkalyq jáne halyqaralyq kórmelerge qatysyp júr. Birneshe oqý quraldarynyń avtory. Á.Qasteev atyndaǵy óner mýzeıinde saltanat qurǵan kórme qarasha aıynyń sońyna deıin jalǵasady.
ALMATY
