Mazmundy is-sharanyń ashylýynda Astana qalasy Tilderdi damytý jáne arhıv isi basqarmasynyń basshysy Sáken Esirkep Alash ardaqtysynyń shyǵarmashylyǵy men qaıratkerligi týraly sóz qozǵap, ónegeli sharanyń mańyzyna toqtaldy.
– Biz aıtýly tulǵalarymyzdyń ómir joldarynan taǵylym alyp, jas urpaqtyń boıyna darytyp, nasıhattaı berýimiz kerek. Bıyl ult ustazynyń mereıtoıy halyqaralyq deńgeıde toılandy. Jyl sońyna taman Astana qalasy ákimdiginiń uıytqy bolýymen Ankara qalasynda Alash arysynyń eskertkish boı kóteredi dep josparlap otyrmyz. Búgingi is-sharanyń da jóni bólek. Ahmet Baıtursynulynyń óleńderin oqyp, mysaldaryn aıtýmen qatar ony teatrlandyrylǵan qoıylym arqyly kórsetý balalarǵa erekshe áser qaldyrady, – deı kelip, saıysqa qatysýshylarǵa sáttilik tiledi.
«Qara shańyraq» ulttyq tárbıe berý mektebiniń jetekshisi Turar Shákenniń aıtýynsha, saıystyń basty maqsaty – kórnekti tulǵanyń aǵartýshylyq baǵyttaǵy murasyn nasıhattap, jas urpaqty ana tilimiz ben ulttyq qundylyqtardy qurmetteýge tárbıeleý.
Saıysqa elorda mektepterinen 100-ge jýyq oqýshy qatysyp, olar «Ultqa qyzmet – ár qazaq balasyna mindet», «Ult ustazyna hat» dep atalǵan eki bólim boıynsha synǵa tústi. Birinshi bólimde balalar A.Baıtursynulynyń shyǵarmalarynan qoıylym ázirlese, ekinshi bólimde ult ustazyna arnap jazǵan haty arqyly bolashaqqa kózqarasyn jetkizdi. Oǵan tarıh ǵylymdarynyń kandıdaty Izathan Medeshova, ardager ustaz Qajymurat Násıuly, Astana qalasy Tilderdi damytý jáne arhıv isi basqarmasy basshysynyń orynbasary Aıgerim Molda-
baeva, Bilim basqarmasynyń ádiskeri Álııa Jańabaeva jáne «Qara shańyraq» ulttyq tárbıe berý mektebiniń jetekshisi Turar Sháken qazylyq etti.
Sonymen, ult ustazynyń shyǵarmalaryn dáriptegen saıystyń bas júldesin Abaı Qunanbaıuly atyndaǵy №87 mektep-gımnazııasy jeńip aldy. Birinshi oryndy Jumeken Nájimedenov atyndaǵy №93 mektep-lıseıi ıelense, ekinshi oryn Názir Tórequlov atyndaǵy №35 mektep-lıseıge buıyrdy. Al úshinshi oryndy Ahmet Baıtursynuly atyndaǵy «binom school» mektep-lıseıi qanaǵat tutty. Sondaı-aq Muhtar Áýezov atyndaǵy №86 mektep-gımnazııasy «Kórermen kózaıymy» atalymymen marapattaldy.
