Osyndaı kezdesýler kezinde oblys prokýrory Nurlan Bıjanov Aral aýdanynda 10-ǵa jýyq turǵyndy qabyldap, jeke máselelerin tyńdady. Qabyldaýǵa kelgen turǵynnyń biri araldyq Z.О́tenov bilim berý uıymdarynyń «Mektep menıý» qosymshasyn paıdalaný úshin negizsiz qarjy tóletip otyrǵanyn aıtyp, shaǵymdandy. Máseleniń mán-jaıymen tanysqan oblys prokýrory kásipkerge zań talaptaryn túsindirip, yqpal etý aktisin engizip, jaǵdaıdyń baqylaýda bolatynyn jetkizdi.
Al Qamystybas aýylynyń turǵyny B.Tileýbaıqyzy balasyna qatysty qozǵalǵan qylmystyq is boıynsha shaǵymdandy. Qylmystyq quqyq buzýshylyq basqa oblysta tirkelgendikten turǵynǵa tıisti qadaǵalaýshy prokýratýraǵa júginý úshin kómek kórsetiledi.
Oblys prokýrorynyń Qazaly aýdanynda ótkizgen jeke qabyldaýynda 6 azamat bolyp, bir turǵynnyń aryzy qabyldandy. Qabyldaýda bolǵan azamattardyń 5-i qylmystyq isterdiń tergelýine jáne ákimshilik isterdiń sotta qaralýyna qatysty máselelermen júginse, bir azamat dári-dármekti ruqsat qaǵazben berý máselesin kóterdi. Al áleýmettik jeli belsendisi D.Dastenova óziniń negizsiz ákimshilik jaýaptylyqqa tartylǵany jóninde jáne aýdanda bolyp jatqan quqyq buzýshylyqtar boıynsha shara qoldaný máselesin kóterdi.
Aldyna aryz-shaǵymmen kelgen ár azamattyń máselesin muqııat tyńdaǵan óńirdiń bas prokýrory ótinishter boıynsha qoıylǵan talaptardyń oryndalýyn óz baqylaýyna alatynyn jetkizdi.
Qarmaqshy aýdanynda ótken jeke qabyldaý barysynda da turǵyndar kókeıde júrgen saýaldaryn qoıyp, pikirlerin bildirdi. Bul óńirde, atap aıtqanda, densaýlyq saqtaý jáne bilim berý salasyndaǵy jekelegen uıymdardyń qyzmetine qatysty másele, sottardyń qaraýyndaǵy qylmystyq jáne azamattyq ister jáne quqyq qorǵaý organdary qyzmetkerleriniń áreketine nemese áreketsizdigine qatysty suraqtar men usynys-pikirler kóterildi.
N.Bıjanov jeke qabyldaýǵa kelgen árbir tulǵaǵa zań talaptaryn túsindirip, máseleniń sheshý joldary boıynsha baǵyt-baǵdar berdi. Qazirgi tańda oblystyq prokýratýranyń muryndyq bolýymen óńirdegi barlyq eldi mekende «Zań kerýeni» aksııasy iske asyrylýda. Bul is-sharanyń basty maqsaty – barlyq aýdan, aýyldarǵa baryp, turǵyndarmen kezdesý, halyqtyń kókeıinde júrgen saýaldaryna jaýap berip, ótinishterin qarap, quqyqtyq kómek kórsetý. Aksııa aıasynda qurylǵan mobıldik toptar shalǵaıdaǵy aýyl-aımaqtarda da jumys isteýde.
Ǵabıt UZAQBAI,
Qyzylorda oblysy prokýratýrasynyń baspasóz hatshysy
