Qys qyr astynda. 5 qarasha kúni keshki saǵat 20:00-de jylý qazandyǵynyń kúl shyǵarý júıesindegi stansada sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratyldy. Nátıjesinde, salqyndatqyshtyń temperatýrasy +39°S deıin tómendep ketken. Aıta ketsek, qalypty temperatýra mólsheri +70°S edi. Oryn alǵan olqylyqqa baılanysty shuǵyl túrde shtab qurylyp, mamandar máseleni sheshý jolyn qarastyryp jatyr.
– Shuǵyl túrde meniń basshylyǵymmen apatty joıý jónindegi shtab quryldy. Shtab táýlik boıy jumys isteıdi. Sondaı-aq jylý stansasyna Sogra jáne О́skemen JEO, «О́skemen jylý jelileri» AQ mamandary keldi. Qazirgi ýaqytta kúl shyǵarý júıesinde qozǵaltqyshty aýystyrý, iske qosý-retteý jumystary júrgizilýde. JEO-ǵa qosymsha 120 tonna mazýt jetkizildi, otyndy jóneltý jalǵasýda, – deıdi aımaq basshysy Danıal Ahmetov.
Sonymen qatar apatty jaǵdaıdy joıý úshin «Qazaqmys» JShS JEO-ǵa 20-dan asa qyzmetker jiberip, jóndeý, qalpyna keltirý jumystaryna qosymsha jabdyqtar bóldi. Odan bólek kómek retinde О́skemenniń «Vostokvzryvprom» JShS-nyń 20 qyzmetkeri keldi. Qalanyń energojúıesiniń úzdiksiz jumys isteýi úshin «Birikken EnergoServıstik Kompanııasy» AQ Rıdderge 12 apattyq brıgada jiberdi. Rıdder qalasynyń bilim bólimi basshylyǵynyń buıryǵymen 7-11 qarashadan bastap mektep oqýshylary qashyqtyqtan oqytý formasyna kóshti. Qalanyń mektepke deıingi mekemeleri de ýaqytsha jumysyn toqtatty.
– Bilim ǵımaratynda jylý áli tarqaı qoıǵan joq. Biraq oqýshylardy qashyqtan oqýǵa jiberdik. Oqý ornynda onlaın oqytý platformasy jumys istep tur. Sharýashylyq qyzmetkerleri kúsheıtilgen rejimde jaǵdaıdy qadaǵalap otyr. Qalada jaǵdaıǵa baılanysty shtab qurylypty. Bilimdi, bilikti mamandar kelip, aqaýlardy retke keltirip jatyr degen habardy estip otyrmyz. Iskerlik tanytsa, másele ońynan sheshiledi, – dep senim bildirdi Rıdder agrotehnıka kolledjiniń dırektory Suńqar Asqaruly.
Resmı aqparatqa sensek, «Tabıǵı jáne tehnogendik sıpattaǵy tótenshe jaǵdaılardyń synyptamasyn belgileý týraly» Úkimettiń 2014 jylǵy 2 shildedegi №756 qaýlysyna sáıkes bul apattyq jaǵdaı jergilikti aýqymdaǵy tótenshe jaǵdaı dep jikteledi. Oblys basshylyǵynyń málimetinshe, jaǵdaı erekshe baqylaýda. Rıdder qalasyn jylýmen jabdyqtaýdy qalpyna keltirý boıynsha barlyq qajetti sharalar qabyldanyp jatyr eken. Al turǵyndar bul qazandyqtyń Keńes úkimeti tarqaǵaly kúrdeli jóndeý kórmegenin aıtady.
– Ekinshi kúnnen asty, úı sýyp ketti. Jyly sý joq. Úıdi elektr energııasymen jylytyp otyrmyz. Elektr energııasyn kóp paıdalanǵandyqtan, energııa kompanııasynan da aqaý shyǵýy múmkin. Mektep pen balabaqsha jabyldy. Iаǵnı bala úıde, ata-ana jumysta. О́rt shyǵyp, qaıǵyly jaǵdaı bolmasa eken. Qaýipti. Ata-ananyń biri jalaqysyn saqtaı otyryp, balalarǵa qaraý kerek. Onyń ústine el tumaýratyp aýyryp jatyr. Taǵy bir aıta keterligi, ákimniń aýyzsha buıryǵymen balabaqshalar, mektepter aldyn ala jyl sońyna deıin jylýǵa tólep tastaǵan. Almaǵan qyzmet úshin qalaı ǵana aldyn ala aqsha tólegen?! Túsiniksiz. Jalpy, Rıdder qazandyǵynyń 98 paıyzyn jóndeý kerek dep mamyrda aıtylǵan. Bul qazandyq Keńes úkimeti taraǵaly kúrdeli jóndeý kórmegen. Alaıda bizdiń basshylyq qyrýar qarjy jumsap, ortalyq alańdy jóndedi. Eshkimge qajeti joq toǵaıdyń arasyna jaryq tartty. Bıýdjettiń qarjysyn maqsatsyz jumsap jatyr degen osy. Sýyqta dirdektep otyrǵanymyz – jemqorlyqtyń, ótirik sıfrdiń, ótirik eseptiń arqasy, – deıdi Rıdder qalasynyń turǵyny Nazar Asaınov.
Iá, aıtsa aıtqandaı-aq. «Qoıshynyń qyzy qoı kelgende is tigedi» demekshi, bizdiń jaqta qara kúzde jol jóndeý jumystary bastalady, qubyrlary aýysady, jylý qazandyqtary da qys kelgende isten shyǵady. Qys qamyn jaz oılap qoıýǵa bolar edi ǵoı. Bilemiz, aıtýǵa ońaı. Deıturǵanmen, jaýapkershilik sezine bermeımiz keıde. Onyń ústine Rıdderdegi dál osy másele tórt-bes jyldan beri kóterilip kele jatqan kórinedi.
Shyǵys Qazaqstan oblysy,
Rıdder qalasy
