Músinshi Baqytjan Ábishevtiń shyǵarmashylyǵy 1970-jyldary Qazaqstan beıneleý ónerine ózindik ulttyq mánerimen endi. Onyń shyǵarmalarynyń qundylyǵy, týyndylarynyń sıýjettik mazmunynyń aýqymdylyǵymen, plastıkalyq sheshimder tabýdaǵy sheberligi hám keńistikte músin jasaýdaǵy erkindigimen erekshelenedi. Ekspozısııada avtordyń 40-qa jýyq músindik týyndylary men ol somdaǵan monýmentaldy eskertkishterdiń fotosýretteri usynylǵan.
Stanoktyq músinnen basqa Baqytjan Ábishev monýmentaldy plastıka salasynda tyń izdenisterge bardy. Qazaqstannyń aıshyqty qalalarynda ornatylǵan qazaq halqynyń uly tulǵalary men batyrlaryna arnalǵan qanshama eskertkishter sheberdiń qaıtalanbas qoltańbasy. Olardyń arasynda: «Jambyl Jabaev» (1996, Almaty), S.Seıfýllın (Qaraǵandy), S.Toraıǵyrov (Baıanaýyl), Mahambet О́temisuly men Isataı Taımanuly (2003, Atyraý), Álııa Moldaǵulova (2004, Aqtóbe. 2008, Astana. 2005, Máskeý.) t.b. bar. Músinshiniń týyndylary Á.Qasteevtiń mýzeı qorynda, Germanııa, Shveısarııa, Reseı elderiniń jeke kolleksııalarynda saqtaýly.
Ábishev áleminde jylqy obrazy aıryqsha oryn alady. Onyń «Qulager» (1986), «Uran» (1986), «Jaýynger» (1987) týyndylary qazaq halqynyń rýhyn sezdiretin kúrdeli dınamıkalyq qozǵalysta berilgen. О́ner ıesiniń áıel obrazyndaǵy kompozısııalarynyń keıipkerleri – áıel-ana, oshaqtyń qamqorshysy, atqa qonǵan qaısar qyzdar keıpinde. B.Ábishev olardyń beınelerin somdaý arqyly óziniń sulýlyq, adamgershilik, rýhanı tektilik týrasyndaǵy tanymyn pash etedi. Ásirese «Umaı» (1986), «Kútý» (1985), «Tomırıs» (1994), «Attyly» (2004) dep atalǵan týyndylary kompozısııalyq áýezdiligimen baýraıdy. Sýretkerdiń músindik týyndylarynyń kóbi qazaq tarıhymen, halyq ómiri jáne salt-dástúrimen astasyp jatyr.
– Baqytjan Ábishev – sanaly ǵumyryn ónerge baǵyshtaǵan sanaýly darynnyń biregeıi. Músin áleminiń qupııasyn sheber meńgergen ol ónerdegi tazalyqty súıdi. «Ábishev álemi» atty kórme óner jankúıerlerin músinshi jasaǵan beınelerdiń erekshe jáne baı álemine úńilýge shaqyrady, sol arqyly naǵyz ónerdiń sıqyryn sezinýge múmkindik beredi. Onyń qalamynan órilgen sáýletti músinder qazaq dalasynyń aıbaryn asqaqtatyp tur. Kórme qarasha aıynyń 19-na deıin jalǵasady, – deıdi kórme jetekshisi Laýra Ábildaeva.
ALMATY
