Atyraý oblysynyń Qurmanǵazy aýdanyna qarasty Súıindik aýylynda muǵalimder otbasynda dúnıege kelgen Ernurdyń ákesi tarıh pəniniń muǵalimi, al anasy bastaýysh synyptarǵa sabaq beredi eken. «Dostarym meni ata-anam sekildi muǵalim bolady dep oılaıtyn. Al meniń armanym – teńizshi bolý edi. 2021 jyldyń qarasha aıynda Aqtaý qalasyna Áskerı-teńiz kúshterine áskerge shaqyrtý aldym. Sol kezde balalyq armanymnyń alǵashqy baspaldaǵyna qadam basqandaı boldym. Qazir sol armanym oryndaldy. Janyma jaqyny – áskerı teńizshi. Áskerı qyzmetimdi de osy saladan bastap kelemin. Aldaǵy ýaqytta osy mamandyǵymnyń shyńyna shyǵyp, jerimdi qorǵaıtyn myqty teńizshi bolsam deımin. Bizde bos ýaqyt bolmaıdy. Únemi oqý-jattyǵý jumystary júrgiziledi, alaıda ár salanyń óz qyzyqtary kóp», deıdi jas teńizshi.
Ernur áńgime barysynda ákesi Danııardyń jıi aıtatyn aqyl-keńesimen de bólisti. «Əkem ylǵı «balam seniń ómirdegi basty maqsattaryńnyń biri Otanǵa qyzmet bolýy kerek» dep aıtatyn. Asqar taýym – ákemniń osy sózderinen keıin Otan aldyndaǵy boryshymdy óteýge esh oılanbastan keldim. 2018 jyly mektepti bitirip, Aqtóbe qalasyndaǵy Mánshúk Mámetova atyndaǵy joǵarǵy medısınalyq kolledjine emdeý isi – feldsher mamandyǵyna oqýǵa túsip, bul oqý ordasyn 2021 jyly aıaqtadym. Bul sala boıynsha qyzmet atqarý – ýaqyttyń enshisinde», deıdi aldaǵy jospary týraly teńizshi.
Ernur Ǵalymjanov Áskerı-teńiz kúshterine shaqyrylǵannan keıin 2022 jyldyń qańtar aıynda 21814 áskerı bóliminiń «Oral» zymyrandy artıllerııalyq kemesiniń zymyrandy artıllerııalyq jaýyngerlik bóliminiń aǵa mamany laýazymyna taǵaıyndalady. Qarýly Kúshterde ótetin oqý-jattyǵýlarǵa belsendi qatysyp, jaqsy nátıjelerge qol jetkizip te úlgergen. Jas teńizshi álemniń áskerı qyzmetshileri baq synaıtyn Halyqaralyq armııa oıyndaryna da qatysqan. Esterińizde bolsa, bul oıyndarda kelisimshart boıynsha bilikti, tájirıbeli áskerı qyzmetshiler men ofıserler baqtaryn synaıdy. Sondaı áskerı saıystardyń biri – 2022 jyly tamyz aıynda Ázerbaıjan astanasy Baký qalasynda ótken «Teńiz kýbogy». Osy jarysqa Ernur merzimdi áskerı qyzmetshi retinde qatysyp, júldeli 2-oryndy jeńip alǵan. Bul jaıynda áskerı qyzmetkerdiń ózi: «Osy júldeni Otan aldyndaǵy boryshymdy óteı júrip jetken jetistigimiz dep esepteımin. Áskerden kóp nárse úırendim. Bastysy – áskerı tártip. Baýyrjan Momyshuly «Tártipke baǵynǵan qul bolmaıdy», deıdi. Ásker úshin temir tártiptiń mańyzdy ekenin túsindim. Josparly dene shynyqtyrý da súıikti isime aınaldy. Bul aıtylǵandar áskerden úırengenderimniń bir bóligi ǵana. Jaýǵa bermes jaýyngerlik dostarymnyń orny bir bólek. «Áskerı ómirdegi dostar – máńgilik» dep otyrýshy edi áskerde qyzmet etken aǵalarymyz. Sebebi 1 jyl boıy ortaq qazannan as iship, kazarmada bir úıdiń balalaryndaı bolyp turyp, qyzmettiń qıyndyǵy men aýyrtpashylyǵyna birge tózip, qýanyshty birge bólisip kelemiz. Jaýyngerlik dostarymmen syılastyǵymyz ári qaraı jalǵasatynyna kámil senemin», deıdi.
«Áskerde júrip ata-ana men jaqyn týystardyń árqaısysynyń orny men qadirin túsindim» degen sarbaz áskerı tártiptiń barlyq nárseni ornymen, ýaqytymen qoldanýdy úıretkenin aıtady. «Bala kezimizde aǵalarymyzdyń áskerden alyp kelgen albomyna qatty qyzyǵatynbyz. Al meniń qazirgi basty maqsatym – Otanym úshin qyzmet etý. Áskerge daıyndyq otbasynan, mektepten bastalatynyna kózim jetti. Biz áskerı antymyzǵa berik bolýymyz kerek. Elimizdiń ár azamaty osy eldiń aýasyn jutyp, sýyn ishkennen keıin Otan aldyndaǵy boryshyn óteýge mindetti. «Otan úshin kúres – erge tıgen úles» degen rýhty sóz arqyly ini-baýyrlarymdy áskerı boryshyn óteýge shaqyramyn», deıdi teńizshi Ernur.
Muhıt QONAROV
Mańǵystaý oblysy
