Is-sharaǵa jınalǵan qaýym túriktiń tanymal aqynyna arnalǵan eskertkish aldyna gúl shoqtaryn qoıdy. Alǵashqy bolyp sóz alǵan shahar basshysy Iýnýs Emreniń shyǵarmalary men ómir joly týraly qysqasha baıandap ótti.
– Baýyrlas túrik halqynyń ataqty qalamgeri Iýnýs Emreni biz Qoja Ahmet Iаsaýıdiń sopylyq ilimin jalǵastyrýshy tulǵa retinde tanımyz. Álbette, uly oıshyldyń shyǵarmalary men eńbekteri súıispenshilik pen meıirimdilik, izgilik pen adamgershilik negizderinen bastaý alady. «Kók túrik» dep rýh alǵan kúlli túrki jurtyna belgili Maǵjan Jumabaevtyń shyǵarmalarynyń ózi osy Iýnýs Emreniń murasymen tyǵyz baılanysty, – dedi ol.
Qala ákimi túbi bir túrki jurtynyń tarıhy men mádenıeti ortaq ekenin, rýhanı baılanystar berik ekenin málimdedi. Oǵan dálel retinde qazaq-túrik dostyǵyn mysalǵa keltirdi. Sonyń ishinde Shymkent pen Túrkııanyń Izmır, Eskıshehır, Adana qalalary arasynda dostyq baılanys ornatylǵanyn aıtty. Shahar basshysynyń aıtýynsha, Túrkııa elimen strategııalyq áriptestik óte berik jáne saýda-ekonomıkalyq qarym-qatynas pen birlesken jobalar da búginde sátti júzege asyp jatyr. Osy oraıda túriktiń aıtýly azamatynyń eskertkishiniń ashylýy eki el arasyndaǵy mádenı-gýmanıtarlyq jáne saýda-ekonomıkalyq áriptestik baılanystardy budan da joǵary beleske kóteretinine senim bildirdi.
Sondaı-aq saltanatty jıyn barysynda Túrkııa Respýblıkasynyń Syrtqy ister mınıstri Mevlıýd Chavoshýglý Túrkııa Respýblıkasynyń Shymkenttegi Qurmetti konsýldyǵynyń jumysymen tanysty. Sonymen birge osy is-sapar aıasynda Túrkııa Syrtqy ister mınıstri men qala ákiminiń qatysýymen arnaıy is-shara uıymdastyrý qarastyrylǵan. Onda shahardyń bıznes ókilderimen kezdesý ótedi dep josparlanyp otyr.
ShYMKENT
