Kórmege sýretshiniń 90-nan asa týyndysy qoıyldy. Onyń kóbi avtordyń bıyl salǵan eńbekterinen quralyp, arnaıy taqyryptarǵa bólingen. Ár taqyryptyń kóterip turǵan júgi jeńil emes bolsa da, bári de – ulttyq bolmysymyzdy aıshyqtaǵan arnaǵa toǵysady. Ásirese jas talanttyń psıhologııalyq portretteri aıtar oıynyń tereńdigimen, boıaýynyń kórkemdigimen erekshelenedi. Biz kóbinese qoǵamdaǵy kez kelgen qubylystyń syrtqy beınesine mán beremiz de, ishki álemine jiti úńilmeımiz. Negizi, osy durys pa? Al sýretshiniń osy portretterin kórgende, syrtqy ásemdikke degen qushtarlyǵyńyz, oıyńyz, kózqarasyńyz ózgeredi. Siz ony endi basqasha túısinesiz. Bul kartınanyń astarynda qazirgi myń qubylǵan ýaqytta adamdyq shynaıy bolmysymyzdy, qasıetimizdi qalaı saqtap qala alamyz degen tereń fılosofııalyq oı jatyr. Sýretshi sony meńzeıdi. Sondaı-aq «Atameken» atty trıptıh músininde qazaqtyń qazynaly qarııasy arqyly – jumyr jerdiń betinde ata-babanyń qany tamǵan jerden artyq el joq ekenin boıaý túsimen kórkem jetkizgen. Al «Ýaqyt jáne qun» atty serııasymen salǵan eńbekterinde alǵashqy ulttyq teńgemizde jarııalanǵan aıtýly tulǵalarymyzdyń beınesi aıshyqty beınelengen. Sonymen qatar qazaqy otbasylyq qundylyqty dáriptegen týyndylary da kelýshilerge mazmundy oı saldy. Mádenı is-sharanyń ashylýynda belgili sýretshi Sembiǵalı Smaǵulov jas talanttyń shyǵarmashylyǵy týraly parasatty oı qorytty.
«Sonaý toqsanynshy jyldardaǵy qıynshylyq kezeńde beıneleý óneriniń damýy kishkene báseńdep qaldy. О́ıtkeni oǵan sol kezdegi kúrdeli jaǵdaıdyń áseri tıdi dep oılaımyn. Áıtpese beıneleý ónerimizge sonaý alpysynshy jyldardan bastap, lek-lek talantty jastar kelip, ulttyq ónerimizdi bıikke kóterdi. Sol úrdis azdap úzilip qalǵandaı bolyp edi. Endi, mine sol, qaıta jandanyp, qazir beıneleý ónerine daryndy jastar kóptep kelip jatyr. Sonyń bel ortasynan Oralbek Qabókeni kóremin. Búgin biz onyń eldi qýantqan kórmesiniń kýási bolyp otyrmyz. Talantty sýretshiniń ár jumysynan ulttyq boıaýǵa baı qoltańbasy aıshyqtalyp turady. Ony eshkimge uqsata almaısyz. Izdengish, aıtar oıy da tereń», dep kórme ıesine jyly lebizin bildirdi. Odan keıin sóz alǵan tanymal qylqalam sheberi Leıla Mahat Oralbektiń ómirge ózgeshe qaraıtyn sýretshi ekendigin atap ótti. «Ol halqymyzdyń tarıhy men salt-dástúrin jaqsy biledi. Bir jaǵynan, shyǵarmalarynan ónerge adaldyǵy kórinedi», dep laıyqty baǵasyn berdi.
Búginde Oralbek Qabókeni kóziqaraqty qaýym zamanaýı daryndy sýretshilerdiń biri retinde jaqsy biledi. Ol T.Júrgenov atyndaǵy Qazaq ulttyq óner akademııasyn támamdaǵan. Birqatar respýblıkalyq jáne halyqaralyq baıqaýdyń júldegeri. 2010 jyly «Sheteldegi qazaq jastary jáne ana tili» atty halyqaralyq óner festıvalinde top jarsa, Qazaq handyǵynyń 550 jyldyq mereıtoıyna arnalǵan respýblıkalyq «Kaspıı kókjıegi» atty sýretshilerdiń baıqaýynda bas júldeni ıelengen.
Is-shara sońynda Oralbek Qabóke kórmege qoıylǵan jumystaryna qysqasha sholý jasady.
«Bul kórmeniń «Beıne» dep atalýy tegin emes. О́ıtkeni ol meniń shyǵarmashylyq beınem ǵana emes, qoǵamdaǵy ár qubylysty jan-dúnıemnen sezinip ótkizgen beınelerdiń jıyntyǵy desem bolady. Kórmege qoıylǵan kartınalarymnyń denin bıyl saldym. Biz qazir ýaqytpen jarysyp kún keshemiz. Árbir óner adamy ózi ómir súrgen ýaqytty bederleıdi. Men de ulttyq beıneden ajyramaı, óz dáýirimniń kelbetin somdap, halqymnyń bolmysy men ereksheligin beınelesem», degen maqsat-múddesin aıta kelip, osy kórmeni ótkizýge muryndyq bolǵan Ulttyq mýzeı ujymy men jınalǵan jurtshylyqqa alǵysyn aıtty.
