Qazir jobanyń vedomstvodan tys saraptamasynyń oń qorytyndysy alyndy. Qurylys-montajdaý jumysyna merdigerlik uıymdy anyqtaý boıynsha konkýrstyq rásimder júrgizilýde. Aıta ketý kerek, bul aýmaqta ekopark salý qala turǵyndary men jaqyn mańdaǵy úılerdiń turǵyndaryna demalýǵa jáne tabıǵat aıasynda serýendeýge múmkindik beredi.
Sol sııaqty jasyl jelek boıynda jaıaý júrginshilerge arnalǵan ınfraqurylym salynatyn bolady, oǵan qum-qıyrshyq tas qospasyn paıdalaný josparlanyp otyr. Saıabaqtyń dızaıny men onyń elementterine erekshe mán beriledi. Qorshaǵan ortaǵa zııany tımeıtin tabıǵı materıaldar paıdalanylady, al bul ekoýrbanızmge sáıkes keledi.
Abattandyrý barysynda tabıǵı jaǵdaılarǵa, oıyn alańdaryna jáne tabıǵı materıaldardan jasalǵan shaǵyn sáýlet nysandaryna kóńil bólinedi. 12 myńnan astam iri aǵash pen jasyl jelek otyrǵyzý josparlanyp otyr, sol sııaqty aýmaqty kógaldandyrýǵa da erekshe nazar aýdarylatyn bolady.
Kishi Taldykóldiń irgeles aýmaǵy ıgeriledi. Onda mektepter, medısınalyq ortalyq, turǵyn úıler, balabaqsha sııaqty áleýmettik nysandar ornalasady.
Al Taldykólde (úlken Taldykól) ekologııalyq ınfraqurylym máselesine nazar aýdarylady. Úlken Taldykól kóliniń janynda qoryq jáne orman-saıabaq aımaǵy bar eldegi alǵashqy tabıǵı park ashylady.
