Foto: Erlan Omar
Senat spıkeri QR Ulttyq kitaphanasynyń ǵımaratynda ornalasqan №111 saılaý ýchaskesinde daýys berdi.
«Jalpy saılaý - kez kelgen el úshin mańyzdy oqıǵa. Búgin qazaqstandyqtar memleketimizdiń bolashaǵyn aıqyndaıdy. Sońǵy jyldar Qazaqstan úshin óte qıyn boldy. Ekonomıkaǵa, eldegi áleýmettik jaǵdaıǵa qatty áser etken pandemııa adamdardyń densaýlyǵyna úlken zııan keltirdi. Jyl qıyn, qaıǵyly bastaldy. Qańtar oqıǵasy - bizdiń memleketimiz úshin qaıǵyly oqıǵa. Biraq halqymyzdyń birligi arqasynda biz úlken qaýip-qaterge tótep berdik. Búginde álemdegi geosaıası ahýal nasharlap, shıelenisýde. Bul jaǵdaıda bizdiń halqymyz birigýi tıis, sonda alǵa qoıǵan maqsattarǵa qol jetkizemiz», dedi Máýlen Áshimbaev.
Senat spıkeriniń aıtýynsha, búginde Qazaqstan teńdestirilgen demokratııalyq júıeni ustanyp otyr
«Referendým qorytyndysy boıynsha Konstıtýsııaǵa engizilgen birqatar normalar prezıdent saılaýyna da qoldanylady. Biz olardyń iske asyrylýyn kórip otyrmyz. Atap aıtqanda, elimizdiń azamattary prezıdentti jeti jyldyq merzimge bir ret saılaıdy. Bul Konstıtýsııanyń jańa normasy. Saılaýdy ashyq, ádil ótkizý óte mańyzdy, sondyqtan kandıdattar óz baǵdarlamalaryn usyndy, halyqty úgittedi. Úmitkerler úshin barlyq jaǵdaılar jasaldy dep sanaımyz. Saılaýdyń halyqaralyq standarttarǵa sáıkes keletindigin 600-den astam baqylaýshy baqylap otyr», dep atap ótti Parlament Senatynyń tóraǵasy.
