Foto: Aqorda
Memleket basshysy Ortalyq saılaý komıssııasynyń qyzmetin qamtamasyz etýde negizgi ról atqarady. Prezıdent komıssııa týraly erejeni bekitip, onyń qyzmet tártibin aıqyndaıdy. Sonymen qatar saılaý men referendýmǵa daıyndyq jáne onyń qorytyndylary týraly aqparatty turaqty túrde tyńdaıdy.
Zańnamada Prezıdenttiń respýblıkalyq referendým ótkizý máselesindegi quzyreti de naqty kórsetilgen. Memleket basshysy referendým ótkizýdi óz bastamasymen nemese memlekettik ınstıtýttar men azamattardyń usynysy negizinde sheshe alady. Referendým bastamasyn keminde 200 myń azamat kótere alady.
Usynystar qaralǵannan keıin Prezıdent referendým ótkizý, zańdy referendýmsyz qabyldaý nemese bastamany keri qaıtarý týraly sheshim qabyldaıdy. Sondaı-aq qoǵam pikirin naqty kórsetý úshin referendýmǵa shyǵarylatyn suraqtardyń mazmunyn túzetýge quqyly.
Qarjy júıesin basqarý salasynda da Prezıdentke mańyzdy ókilettikter berilgen. Prezıdent Ulttyq bank tóraǵasyn taǵaıyndap, qyzmetinen bosatady, sondaı-aq onyń orynbasarlaryn bekitedi. Bul aqsha-nesıe saıasatynyń turaqtylyǵyn saqtaýǵa jáne qarjy júıesindegi úılesimdi jumysty qamtamasyz etýge baǵyttalǵan.
Sonymen birge Memleket basshysy Ulttyq banktiń qyzmeti týraly esepti toqsanyna keminde bir ret tyńdaıdy. Bul qarjy júıesiniń turaqtylyǵyn baqylaýǵa múmkindik beredi.
Prezıdenttiń ókilettigi Joǵary aýdıtorlyq palata qyzmetine de qatysty. Memleket basshysy palata tóraǵasyn taǵaıyndap, Quryltaıdyń kelisimimen segiz múshesin bes jyl merzimge bekitedi. Budan bólek, osy organnyń qyzmetin retteıtin erejeni de Prezıdent bekitedi.
Joǵary aýdıtorlyq palata Prezıdent aldynda turaqty esep beredi. Bul memlekettik qarajattyń jumsalýyna baqylaýdy kúsheıtip, syrtqy aýdıttiń tıimdiligin arttyrýǵa múmkindik beredi.
Jańartylǵan normalarda Prezıdenttiń jergilikti atqarýshy bılikti qalyptastyrýdaǵy róli de aıqyndalǵan. Memleket basshysy Astana, oblystar jáne respýblıkalyq mańyzy bar qalalardyń ákimderin tıisti máslıhattardyń kelisimimen taǵaıyndaıdy.
Prezıdent ákimderge tapsyrma berip, olardyń oryndalýyn esepteýler arqyly baqylap otyrady. Qajet bolǵan jaǵdaıda, sonyń ishinde máslıhat senimsizdik bildirgen kezde, ákimderdi qyzmetinen bosatýǵa quqyly.
Sonymen qatar Prezıdentke tikeleı baǵynatyn memlekettik organdardyń qyzmetine qatysty ókilettikter de bekitilgen. Jańa Prezıdent qyzmetine kiriskennen keıin mundaı organdardyń basshylary jańa taǵaıyndaýlar jasalǵanǵa deıin óz mindetin atqara beredi.
Memleket basshysy bul organdardyń qurylymy men shtat sanyn bekitip, basshylaryn jáne olardyń orynbasarlaryn taǵaıyndaıdy. Sondaı-aq vedomstvolardy qurý, qaıta uıymdastyrý nemese taratý týraly sheshim qabyldaı alady. Budan bólek, Prezıdent atalǵan organdar jetekshileriniń esebin turaqty túrde tyńdap otyrady.
