Foto: Ashyq derekkóz
Bul rette, jańa redaksııada plebıssıt usyný quqyǵy endi barynsha keń sýbektiler sheńberine bekitilgeni nazar aýdarýǵa turarlyq. Ol Quryltaı men Úkimetke, sondaı-aq Qazaqstan Halyq Keńesine jáne keminde 200 myń saılaýshy usynǵan azamattyq bastamaǵa taraldy. Mundaı ınklıýzıvtilik referendýmdy memleket pen qoǵam damý jolyn tańdaý úshin jaýapkershilikti bólisetin dıalogtyń jumys isteý tetigine aınaldyrady.
Keńinen qatysý jáne ózara baqylaýdyń bul logıkasy óńirlik deńgeıde de jalǵasyn tabady. Tikeleı demokratııa jáne jurtshylyqtyń pikirin eskerý prınsıpteri jergilikti bılikti qalyptastyrý rásimderinde de kórinis tabady. Osy júıe aıasynda elorda jáne oblys ákimderin taǵaıyndaý tek jergilikti máslıhat depýtattarynyń qoldaýymen ǵana múmkin bolady. Osylaısha, zań strategııalyq máseleler jalpyulttyq dıalog arqyly sheshiletin, al óńirlerdegi kadrlyq sheshimder halyq ókildiginiń súzgisinen ótetin esep berýdiń birtutas vertıkalin qurady.
Qazaqstan Respýblıkasy Vıse-prezıdenti laýazymyn engizý ınstıtýsıonaldyq turaqtylyqty nyǵaıtýdaǵy mańyzdy kezeńge aınalady. Zańnamaǵa sáıkes, bul laýazymǵa taǵaıyndaýdy Memleket basshysy Quryltaıdyń mindetti kelisimimen júzege asyrady, bul atalǵan tulǵanyń legıtımdiliginiń joǵary deńgeıin aıqyndaıdy. Vıse-prezıdent memlekettik basqarýdyń úzdiksizdigin qamtamasyz etedi, Quryltaımen jáne Úkimetpen ózara is-qımyl jasaý kezinde Prezıdenttiń múddelerin bildiredi, sondaı-aq Memleket basshysynyń ózge de tapsyrmalaryn oryndaıdy.
Prezıdenttiń qyzmetin retteıtin quqyqtyq aktiler men memlekettik kepildikter júıesi basqarýdyń joǵary organynyń tıimdi jumys isteýin qamtamasyz etýge baǵyttalǵan. Shyǵarylatyn jarlyqtar men ókimderdiń eldiń búkil aýmaǵynda mindetti kúshi bar. Jarlyqtarmen áleýmettik-ekonomıkalyq jáne qoǵamdyq-saıası damýdyń strategııalyq máseleleri boıynsha sheshimder qabyldanady, sondaı-aq Quryltaıdyń nemese Úkimettiń quzyretine kirmeıtin salalar retteledi. Aktilerdiń mundaı qurylymy quqyqtyq turaqtylyqty saqtaı otyryp, ishki jáne syrtqy syn-qaterlerge jedel áreket etýge múmkindik beredi.
5 jyl merzimge 145 depýtat – Májilis Quryltaı týraly konstıtýsııalyq zańdy maquldady
Memleket basshysynyń quqyqtyq mártebesi onyń konstıtýsııalyq mindetterin oryndaý kezindegi táýelsizdigin qamtamasyz etetin ımmýnıtetter men kepildikter júıesin qamtıdy. Zańnamalyq normalar prezıdenttik ınstıtýtqa ákimshilik nemese ózge de qysym jasaý múmkindigin joqqa shyǵarady jáne memlekettik ókilettikterdi iske asyrý úshin jaǵdaı jasaıdy. Quqyqtyq aıqyndyq pen materıaldyq qamtamasyz etýdiń uqsas prınsıpteri eks-prezıdentterge qatysty da qoldanylady, bul turaqty saıası júıelerdiń jumys isteýiniń halyqaralyq standarttaryna sáıkes keledi. Bul tásil ulttyq kýrsty iske asyrý úshin qorǵalǵan ortany qalyptastyrady jáne Prezıdenttiń el birligi men turaqtylyǵynyń kepili retindegi mártebesin bekitedi.
