Olardyń aıtýynsha, ázirshe ózderi aralaǵan saılaý ýchaskelerinde eshqandaı buzýshylyqtar baıqalmaǵan.
«Qazaqstanǵa alǵash ret kelip otyrǵan joqpyn. 2019 jylǵy saılaýǵa sheteldik baıqaýshy retinde qatysqan edim. Sol joly mundaǵy saılaý prosesiniń ashyqtyǵyna kóz jetkizgenbiz. Bul joly da bári oıdaǵydaı bolady degen senimdemin. Tańerteńnen beri birneshe saılaý ýchaskesine bardym. Saılaýshylardyń belsendiligi jaqsy. Árıne, ár eldegi saılaý ártúrli ótedi. Eń bastysy saıası doda ashyq ári ádil ótse – senimniń aqtalǵany», dedi Reza Tabrızı.
Sheteldik baıqaýshy áli birneshe saılaý ýchaskesine barýdy josparlap otyrǵanyn aıtty.
«Árıne, birneshe ýchaskege baryp, jalpy saıası dodaǵa baǵa bere almaımyz. Sondyqtan saılaý aıaqtalǵanǵa deıin jumys isteımiz. Astana saılaý ýchaskelerinde múmkindigi shekteýli adamdarǵa jaqsy jaǵdaı jasalǵan. Osyny bóle-jara atap ótkim keledi», dedi Reza Tabrızı.
Tańerteńnen beri Astanadaǵy birneshe saılaý ýchaskesine barǵan Abıd Chohan jastardyń belsendiligi tómen ekenin jetkizdi.
«Tańdaý jasaýǵa kelgen turǵyndardyń qatary kóp. Alaıda olardyń ishinde jastardyń úlesi az sekildi. Jastar – eldiń bolashaǵy. Sondyqtan olardy mańyzdy is-sharalarǵa barynsha tartý kerek. Qazaqstanǵa alǵash ret kelip otyrmyn. Bul memleket maǵan unady. Buıyrtsa, keler jylǵy saılaýǵa da qatyssam degen nıet bar», dedi Abıd Chohan.
